Májilis depýtattary «Qazaqstan Halyq keńesi týraly» zań jobasyn qaraýǵa kiristi, dep habarlaidy dalanews.kz.
Jańa qurylym týraly alǵash ret Qazaqstannyń jańa Konstitýtsiiasyn daiyndaý kezinde aitylǵan. Jospar boiynsha Konstitýtsiia biylǵy 1 shildeden bastap kúshine enedi. Osyǵan bailanysty elde aýqymdy parlamenttik reforma bastalmaq.
Zań jobasyna sáikes, «Qazaqstan Halyq keńesi» halyq múddesin bildiretin joǵary konsýltativtik organ bolady. Onyń quramyna azamattyq qoǵam men qoǵamdyq birlestikterdiń ókilderi kiredi. Al qurylymnyń jumys tártibi men ony jasaqtaý qaǵidalary arnaiy konstitýtsiialyq zańmen bekitiledi.
Májiliste qazir osy zań jobasy men Parlament palatalarynyń birlesken komissiiasyna kiretin depýtattardy sailaý rásimi qaralyp jatyr.
Qujatqa sáikes, Halyq keńesiniń ókilettigi keń bolady. Atap aitqanda, organ ishki saiasat, qoǵamdyq kelisim jáne ulttyq birlik máseleleri boiynsha usynymdar ázirlei alady. Sonymen qatar Quryltaiǵa zań jobalaryn usyný jáne respýblikalyq referendým ótkizý bastamasyn kóterý quqyǵyna ie bolmaq.
Buǵan deiin Prezident Qasym-Jomart Toqaev Halyq keńesine úlken úmit artatynyn aitqan edi. Memleket basshysynyń sózinshe, jańa qurylym eldegi qoǵamdyq-saiasi ómirdiń ózekti máselelerin talqylaityn alańǵa ainalýy tiis.
Jańa Konstitýtsiia kúshine engennen keiin Qazaqstanda parlamenttik júie de ózgeredi. Aqparatqa sáikes, Senat taratylyp, Parlament bir palataly júiege kóshedi. Qazirgi depýtattyq quram 1 shildege deiin jumysyn jalǵastyryp, keiin resmi túrde taratylmaq.
