Qazaqstanda jylqyǵa arnalǵan jańa mereke - «Tulpar kúnin» belgileý máselesi qarastyrylyp jatyr. Bul týraly Úkimet Májilis depýtattarynyń saýalyna bergen jaýabynda málimdedi, dep habarlaidy Dalanews.kz.
Mamyr aiynyń sońynda AMANAT, «Aq jol» jáne OSDP partiialarynan birneshe depýtat Premer-ministr Oljas Bektenovke elimizde jylqy sharýashylyǵyn damytý týraly depýtattyq saýal joldaǵan edi. Onda halyq qalaýlylary kadr tapshylyǵyn, infraqurylymnyń (ásirese, at shabatyn ippodromdardyń) tozýyn jáne ózge de máselelerdi kótergen.
Sonymen qatar depýtattar túrki mifologiiasyndaǵy qanatty tulpardyń qurmetine arnalǵan «Tulpar kúnin» engizýdi usyndy.
«Qazaq halqynyń tarihyndaǵy jylqynyń rólin simvolikalyq deńgeide moiyndaý - ýaqyt talaby. Kóptegen elde jylqyǵa arnalǵan ulttyq kúnder bar», - delingen saýalda.
Oljas Bektenov qol qoiǵan resmi jaýapta Qazaqstanda jylqy basynyń ósip jatqany, qymyz ben jylqy etin óndirý kólemi artqany aitylǵan. Sondai-aq jylqy sharýashylyǵy salasynyń mamandary eki joǵary oqý ornynda daiyndalatyny, Aqtóbe oblysynda Konevodtyq ǵylymi-zertteý institýty jumys isteitini atap ótilgen.
Al «Tulpar kúnine» qatysty Premer-ministr maýsym aiynyń ekinshi jeksenbisi - Qazaqstanda malshylar kúni retinde atalyp ótetinin, al 11 shilde - BUU-ǵa múshe elderde Dúniejúzilik jylqy kúni retinde tanylǵanyn eske saldy.
«Osyǵan bailanysty „Tulpar kúni“ atty arnaiy ulttyq mereke bekitý máselesi qosymsha qaralatyn bolady», - delingen Úkimettiń jaýabynda.
