قازاقستاندا جىلقىعا ارنالعان جاڭا مەرەكە - «تۇلپار كۇنىن» بەلگىلەۋ ماسەلەسى قاراستىرىلىپ جاتىر. بۇل تۋرالى ۇكىمەت ءماجىلىس دەپۋتاتتارىنىڭ ساۋالىنا بەرگەن جاۋابىندا مالىمدەدى، دەپ حابارلايدى Dalanews.kz.
مامىر ايىنىڭ سوڭىندا AMANAT، «اق جول» جانە وسدپ پارتيالارىنان بىرنەشە دەپۋتات پرەمەر-مينيستر ولجاس بەكتەنوۆكە ەلىمىزدە جىلقى شارۋاشىلىعىن دامىتۋ تۋرالى دەپۋتاتتىق ساۋال جولداعان ەدى. وندا حالىق قالاۋلىلارى كادر تاپشىلىعىن، ينفراقۇرىلىمنىڭ (اسىرەسە، ات شاباتىن يپپودرومداردىڭ) توزۋىن جانە وزگە دە ماسەلەلەردى كوتەرگەن.
سونىمەن قاتار دەپۋتاتتار تۇركى ميفولوگياسىنداعى قاناتتى تۇلپاردىڭ قۇرمەتىنە ارنالعان «تۇلپار كۇنىن» ەنگىزۋدى ۇسىندى.
«قازاق حالقىنىڭ تاريحىنداعى جىلقىنىڭ ءرولىن سيمۆوليكالىق دەڭگەيدە مويىنداۋ - ۋاقىت تالابى. كوپتەگەن ەلدە جىلقىعا ارنالعان ۇلتتىق كۇندەر بار»، - دەلىنگەن ساۋالدا.
ولجاس بەكتەنوۆ قول قويعان رەسمي جاۋاپتا قازاقستاندا جىلقى باسىنىڭ ءوسىپ جاتقانى، قىمىز بەن جىلقى ەتىن ءوندىرۋ كولەمى ارتقانى ايتىلعان. سونداي-اق جىلقى شارۋاشىلىعى سالاسىنىڭ ماماندارى ەكى جوعارى وقۋ ورنىندا دايىندالاتىنى، اقتوبە وبلىسىندا كونيەۆودتىق عىلىمي-زەرتتەۋ ينستيتۋتى جۇمىس ىستەيتىنى اتاپ وتىلگەن.
ال «تۇلپار كۇنىنە» قاتىستى پرەمەر-مينيستر ماۋسىم ايىنىڭ ەكىنشى جەكسەنبىسى - قازاقستاندا مالشىلار كۇنى رەتىندە اتالىپ وتەتىنىن، ال 11 شىلدە - بۇۇ-عا مۇشە ەلدەردە دۇنيەجۇزىلىك جىلقى كۇنى رەتىندە تانىلعانىن ەسكە سالدى.
«وسىعان بايلانىستى „تۇلپار كۇنى“ اتتى ارنايى ۇلتتىق مەرەكە بەكىتۋ ماسەلەسى قوسىمشا قارالاتىن بولادى»، - دەلىنگەن ۇكىمەتتىڭ جاۋابىندا.
