Májilis depýtaty Erlan Sairov jol apattaryna qatysty qorqynyshty statistikany aitty, dep habarlaidy Dalanews.kz.
Derekterge kóz júgirtsek, Qazaqstanda 2025 jyldyń birinshi jartysynda 15 698 jol apaty bolǵan. Bul byltyrmen salystyrǵanda 54 paiyzǵa kóp. Jol apatynda 22 346 adam zardap shegip, 1 466 adam qaza tapqan.
"Tek bir aidyń ishinde Qazaqstanda iri jol apattary bolyp, 25 adamnyń ómiri qiylǵan. Mańǵystaý oblysynda jol apatynan 10 adam, Jetisý oblysynda 10 adam, Qaraǵandy oblysynda 5 adam qaza tapqan. Iaǵni beibit kúnde qanshama otbasy qaiǵy jutyp, qara jamylyp qaldy. Bul – óte alańdatarlyq jaǵdai!" - dedi ol.
Jyl basynan beri Qaraǵandy oblysynyń tasjoldarynda 49 adam qaza tapsa, sonyń úshten biri taksi qyzmetin paidalanǵan azamattar eken.
"Taksi júrgizýshilerdiń kópshiligi – jas jetkinshekter. Olar kúni-túni demalmai, úsh-tórt ret qalaaralyq reis jasap, jolaýshylar tasymaldaidy. Túni boiy deneni sergitetin sýsyn iship, onyń áseri bitkennen keiin lezde uiyqtap ketedi. Sonyń saldarynan jol apaty bolady.
Budan bólek qalaaralyq tasymaldaýda kóbinese oń jaq rýldi Toyota Alphard kólikteri qoldanysta. Bul aldyndaǵy kólikten basyp ozý barysynda qarsy jolaqta kele jatqan kólikti kórýge kedergi jasap, jii jol apatyna ushyratyp jatyr. Muny da shekteitin ýaqyt jetti", - dedi depýtat.
