مەجٸلٸس دەپۋتاتى ەرلان سايروۆ جول اپاتتارىنا قاتىستى قورقىنىشتى ستاتيستيكانى ايتتى, دەپ حابارلايدى Dalanews.kz.
دەرەكتەرگە كٶز جٷگٸرتسەك, قازاقستاندا 2025 جىلدىڭ بٸرٸنشٸ جارتىسىندا 15 698 جول اپاتى بولعان. بۇل بىلتىرمەن سالىستىرعاندا 54 پايىزعا كٶپ. جول اپاتىندا 22 346 ادام زارداپ شەگٸپ, 1 466 ادام قازا تاپقان.
"تەك بٸر ايدىڭ ٸشٸندە قازاقستاندا ٸرٸ جول اپاتتارى بولىپ, 25 ادامنىڭ ٶمٸرٸ قيىلعان. ماڭعىستاۋ وبلىسىندا جول اپاتىنان 10 ادام, جەتٸسۋ وبلىسىندا 10 ادام, قاراعاندى وبلىسىندا 5 ادام قازا تاپقان. ياعني بەيبٸت كٷندە قانشاما وتباسى قايعى جۇتىپ, قارا جامىلىپ قالدى. بۇل – ٶتە الاڭداتارلىق جاعداي!" - دەدٸ ول.
جىل باسىنان بەرٸ قاراعاندى وبلىسىنىڭ تاسجولدارىندا 49 ادام قازا تاپسا, سونىڭ ٷشتەن بٸرٸ تاكسي قىزمەتٸن پايدالانعان ازاماتتار ەكەن.
"تاكسي جٷرگٸزۋشٸلەردٸڭ كٶپشٸلٸگٸ – جاس جەتكٸنشەكتەر. ولار كٷنٸ-تٷنٸ دەمالماي, ٷش-تٶرت رەت قالاارالىق رەيس جاساپ, جولاۋشىلار تاسىمالدايدى. تٷنٸ بويى دەنەنٸ سەرگٸتەتٸن سۋسىن ٸشٸپ, ونىڭ ەسەرٸ بٸتكەننەن كەيٸن لەزدە ۇيىقتاپ كەتەدٸ. سونىڭ سالدارىنان جول اپاتى بولادى.
بۇدان بٶلەك قالاارالىق تاسىمالداۋدا كٶبٸنەسە وڭ جاق رۋلدٸ Toyota Alphard كٶلٸكتەرٸ قولدانىستا. بۇل الدىنداعى كٶلٸكتەن باسىپ وزۋ بارىسىندا قارسى جولاقتا كەلە جاتقان كٶلٸكتٸ كٶرۋگە كەدەرگٸ جاساپ, جيٸ جول اپاتىنا ۇشىراتىپ جاتىر. مۇنى دا شەكتەيتٸن ۋاقىت جەتتٸ", - دەدٸ دەپۋتات.
