Qazaqstanda stalking úshin jaýapkershilikti kúsheitý usynyldy. Ishki ister ministrligi jábirlenýshini qaita-qaita qýdalaý faktileri úshin qylmystyq jazany qatańdatýdy kózdep otyr, dep habarlaidy dalanews.kz.
Bul týraly Májilis kýlýarynda Ishki ister ministriniń orynbasary Sanjar Ádilov málimdedi.
Onyń aitýynsha, vedomstvo stalking týraly bapqa «qaitalaný» belgisin engizýdi usynyp otyr. Eger adam osy qylmysy úshin buryn jaýapqa tartylyp, keiin qaitadan jábirlenýshini qýdalasa, oǵan qatysty jaza kúsheitilýi múmkin.
«Biz stalking boiynsha qaitalaný belgisin engizýdi usynyp otyrmyz. Jaýapkershilikti kúsheitemiz. Qylmysty ortasha aýyrlyq sanatyna jatqyzyp, bes jylǵa deiin bas bostandyǵynan aiyrý jazasyn qarastyrý josparlanyp otyr. Bul másele áli talqylanady», – dedi Ádilov.
Ministrdiń orynbasary mundai ózgeristerdi engizý qajettiligi quqyq qoldaný tájiribesi barysynda anyqtalǵanyn aitty.
Mysal retinde ol Almaty oblysyndaǵy jaǵdaidy keltirdi. Onda stalking úshin jazasyn ótegen er adam bostandyqqa shyqqannan keiin burynǵy jábirlenýshisin qaita qýdalai bastaǵan.
«Árine, oǵan qatysty qaitadan qylmystyq is qozǵadyq. Biraq biz qaitalaný belgisin engizý qajet ekenin kórip otyrmyz», – dep atap ótti Sanjar Ádilov.
Aita keteiik, stalkingke qatysty qylmystyq jaýapkershilik Qazaqstanda jaqynda ǵana engizilgen bolatyn. Endi quqyq qorǵaý organdary bul bapty odan ári kúsheitýdi usynyp otyr.
