Májilis depýtattary memlekettik qyzmetshilerge kásipkerlik qyzmetpen ainalysýǵa ruqsat beretin zań jobasyn birinshi oqylymda maquldady. Oǵan sáikes, máselen endi Úkimet múshelerine baspanasyn jalǵa berip te tabys tabýyna múmkindik beriledi, dep jazady Dalanews.kz.
"Konstitýtsiialyq sot "Sybailas jemqorlyqqa qarsy is-qimyl týraly" Zańnyń 13-babynda memlekettik qyzmetshilerge teńestirilgen adamdardyń biznespen ainalysýyna salatyn tyiymdy Konstitýtsiiaǵa qaishy dep sheshti. Olardyń qataryna RMK, kommýnaldyq kásiporyndar, kommýnaldyq memlekettik mekemeler, onyń ishinde mektepterde, aýrýhanalarda basqarýshylyq fýnktsiialardy atqaratyndar jatady (birinshi basshylar, olardyń orynbasarlary, memlekettik satyp alý departamentteriniń basshylary, filial basshylary)", - dedi QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Ulan Sarqulov 2 qazanda ótken Májilistiń jalpy otyrysynda.
Alaida biznespen ainalysý úshin memlekettik qyzmetshilerge birneshe mańyzdy talaptar qoiylady eken.
"Birinshiden, tiisti biznesi olardyń laýazymdyq mindetterin oryndaýyna kedergi keltirmeýi qajet. Ekinshiden, eń bastysy, jeke qyzmetine memlekettiń múlkin paidalanýyna jol bermeýi kerek. Úshinshiden, laýazymdyq mindetteri men biznes múddeleriniń shielenisýine jol joq. Degenmen, ulttyq kompaniialar men ulttyq holdingterdiń qatardaǵy qyzmetkerleri qazirdiń ózinde zańmen tyiym salynbaǵan kez kelgen kásipkerlik qyzmetpen ainalysýǵa quqyly, óitkeni olar "memlekettik fýnktsiialardy oryndaýǵa ýákilettik berilgen adamdarǵa teńestirilgender" degen sanatqa jatpaidy", – dep atap ótti tóraǵa orynbasary.
Al sailaý komissiialarynda, Ulttyq bankte, Qarjy naryǵyn retteý jáne damytý agenttiginde jáne aviatsiialyq ákimshilikte basty laýazymdy qyzmetterdi atqaratyndar, sondai-aq ulttyq holdingter men kompaniialardyń menedjerleri úshin bul rettegi tyiym óz kúshin saqtaidy.
Sondai-aq, zańnamadan sheneýnikterge páterin jalǵa berip, tabys tabýyna salynǵan norma da alynyp tastalmaq.
"Iaǵni, Úkimet músheleri basqa saiasi memlekettik qyzmetshiler sekildi ózderine tiesili baspanany jalǵa bere alady", - dep sózin túiindedi Ulan Sarqulov.
Aita ketsek, Qazaqstanda memlekettik qyzmetshilerge qoiylatyn talaptar ózgertildi. Memleket basshysy Qasym-Jomart Toqaev 2024 jylǵy 31 shildede osy sipattaǵy Jarlyqqa qol qoidy.
