Qazaqstanda sheteldik buqaralyq aqparat quraldarynyń ókildikteri men jýrnalisterin akkreditteý qaǵidalary qaita qaralmaq. Syrtqy ister ministrligi tiisti buiryq jobasyn ázirledi, dep habarlaidy dalanews.kz.
Qujattyń sipattamasynda usynylǵan ózgerister halyqaralyq tájiribe men aqparattyq ózara is-qimyldy uiymdastyrýdyń zamanaýi tásilderin eskere otyryp daiyndalǵany kórsetilgen.
"Jobanyń maqsaty – Qazaqstan Respýblikasynyń Syrtqy ister ministrligi janyndaǵy sheteldik buqaralyq aqparat quraldary ókilderin akkreditteý tártibin jetildirý. Usynylyp otyrǵan ózgerister uiymdastyrýshylyq sipatqa ie jáne qoldanystaǵy rásimderdi retke keltirýge baǵyttalǵan. Sonymen birge buqaralyq aqparat quraldarynyń kásibi derbestigi saqtalyp, akkreditteýden ótýdiń túsinikti ári ashyq sharttary qamtamasyz etiledi", – delingen joba sipattamasynda.
Syrtqy ister ministrliginiń málimetinshe, qujat qabyldanǵan jaǵdaida quqyqtyq, áleýmettik nemese ekonomikalyq turǵydan teris saldar týyndamaidy. Sondai-aq jańa talaptar eldiń ulttyq qaýipsizdigine keri áser etpeidi dep boljanyp otyr.
Ázirge akkreditteý rásimderine naqty qandai ózgerister engiziletini egjei-tegjeili habarlanǵan joq.
