Qazaqstanda shegirtke ziiankesterine qarsy qorǵanys jumystary tolyq aiaqtaldy. Biyl aýyl sharýashylyǵy daqyldarynyń zaqymdanýyna jol berilmegen. Bul týraly Aýyl sharýashylyǵy ministrligi málimdedi, dep habarlaidy dalanews.kz.
Ministrliktiń málimetinshe, sońǵy eki jylda fitosanitariialyq qyzmetti jańǵyrtý nátijesinde himiialyq óńdeý júrgizilgen alqap kólemi 3,1 mln gektardan 1,8 mln gektarǵa deiin qysqaryp, 42%-ǵa azaiǵan. Soǵan qaramastan, egistikterdi ziiankesterden qorǵaý tolyq qamtamasyz etilgen.
Biyl himiialyq óńdeý jumystary 1,8 mln gektar aýmaqta agrotehnikalyq talaptarǵa sáikes júrgizilgen.
Ministrlik muny jappai himiialyq óńdeýden ziiankesterdiń taralýyn erte anyqtap, oshaqtardy der kezinde oqshaýlaýǵa negizdelgen jańa basqarý júiesine kóshýmen bailanystyrady.
Salany tsifrlandyrý aiasynda fitosanitariialyq ahýaldy naqty ýaqyt rejiminde baqylaýǵa múmkindik beretin FITOCENTRE geoaqparattyq júiesi iske qosylǵan. Sondai-aq monitoring pen himiialyq óńdeý jumystaryn júrgizý úshin 103 ushqyshsyz ushý apparaty satyp alynyp, búrký tehnikasynyń sany 427-den 556 birlikke deiin kóbeitilgen.
Ministrliktiń málimetinshe, júrgizilgen reformalardyń nátijesinde 2026 jyly biýdjet shyǵystary 2024 jylmen salystyrǵanda 2 mlrd teńgege nemese 25%-ǵa qysqarǵan.
Qazirgi ýaqytta shekara mańyndaǵy óńirlerdegi fitosanitariialyq jaǵdai turaqty. Ministrlik shegirtke ziiankesteriniń kóshý derekteri tirkelmegenin, qajetti tehnika shekaralyq aimaqtarda daiyn turǵanyn jáne fitosanitariialyq ahýalǵa turaqty monitoring jalǵasyp jatqanyn málimdedi.
