Qazaqstanda qurylys salasy ekonomikanyń serpindi baǵyttarynyń birine ainaldy. 2025 jyl bul sala úshin nátijeli boldy. Ótken jyldyń qorytyndysy boiynsha elde 20,1 mln sharshy metr turǵyn úi paidalanýǵa berildi. Bul josparlanǵan 19,2 mln sharshy metrden asyp tústi jáne 185 myńnan astam páterdi qamtydy, dep habarlaidy Dalanews.kz.
Turǵyn úi qurylysynyń negizgi kólemi Astana, Almaty jáne Shymkent qalalarynda shoǵyrlanǵan. Úsh megapolistiń úlesine 8,8 mln sharshy metr nemese orta eseppen 45 sharshy metrden eseptegende shamamen 200 myń bir bólmeli páter keledi.
Qurylys salasynyń áseri tek jańa úilermen shektelmeidi. Bul baǵyt ekonomikany birneshe arna arqyly qoldaidy. Máselen, qurylys kompaniialaryna tapsyrys beredi, halyqtyń ál-aýqatyn jaqsartady jáne ilespe salalardyń damýyna jol ashady.
Qurylys materialdaryna degen suranys ta artyp keledi. 2025 jyldyń alǵashqy 10 aiynyń qorytyndysy boiynsha Qazaqstandaǵy qurylys materialdary naryǵy shamamen 2,5 mlrd dollar dep baǵalanǵan. Onyń 70 paiyzy – otandyq ónim. Elde beton men qurylystyq qospalar, tsement, keramikalyq kirpish, plitka, jylý oqshaýlaǵysh materialdar, linoleým jáne ózge de ónimder óndiriledi.
Degenmen keibir baǵyttarda importqa táýeldilik saqtalyp otyr. Atap aitqanda, sanitarlyq faians pen lift jabdyqtary ázirge keń kólemde óndirilmeidi. Alaida qurylys kóleminiń turaqty ósýi bul segmentterdiń de birtindep damýyna múmkindik beredi.
Qazirgi kezde elde birqatar jańa óndiristik jobalar iske asyrylýda. Almatyda jylyna 162 myń tekshe metr gazobeton bloktaryn shyǵaratyn óndiris iske qosylýda. Astanada 1 mln tekshe metr mineraldy plita jáne 1,8 mln sharshy metr sendvich-panel óndiretin zaýyttar iske qosý josparlanǵan.
Bul jobalar jańa jumys oryndaryn ashyp qana qoimai, qurylys salasyn qajetti materialdarmen turaqty qamtamasyz etýge yqpal etedi. Sonyń nátijesinde turǵyn jáne óndiristik nysandardy salýda qazaqstandyq ónimniń úlesi arta túsýde.
Qurylys salasy búginde ishki naryqqa baǵyttalǵan naqty óndiristiń damýyn kórsetetin mańyzdy mysalǵa ainaldy. Onyń nátijesi – el ekonomikasynyń nyǵaiýy men azamattardyń turmys sapasynyń jaqsarýy.
