قازاقستاندا قۇرىلىس سالاسى ەكونوميكانىڭ سەرپىندى باعىتتارىنىڭ بىرىنە اينالدى. 2025 جىل بۇل سالا ءۇشىن ناتيجەلى بولدى. وتكەن جىلدىڭ قورىتىندىسى بويىنشا ەلدە 20،1 ملن شارشى مەتر تۇرعىن ءۇي پايدالانۋعا بەرىلدى. بۇل جوسپارلانعان 19،2 ملن شارشى مەتردەن اسىپ ءتۇستى جانە 185 مىڭنان استام پاتەردى قامتىدى، دەپ حابارلايدى Dalanews.kz.
تۇرعىن ءۇي قۇرىلىسىنىڭ نەگىزگى كولەمى استانا، الماتى جانە شىمكەنت قالالارىندا شوعىرلانعان. ءۇش مەگاپوليستىڭ ۇلەسىنە 8،8 ملن شارشى مەتر نەمەسە ورتا ەسەپپەن 45 شارشى مەتردەن ەسەپتەگەندە شامامەن 200 مىڭ ءبىر بولمەلى پاتەر كەلەدى.
قۇرىلىس سالاسىنىڭ اسەرى تەك جاڭا ۇيلەرمەن شەكتەلمەيدى. بۇل باعىت ەكونوميكانى بىرنەشە ارنا ارقىلى قولدايدى. ماسەلەن، قۇرىلىس كومپانيالارىنا تاپسىرىس بەرەدى، حالىقتىڭ ءال-اۋقاتىن جاقسارتادى جانە ىلەسپە سالالاردىڭ دامۋىنا جول اشادى.
قۇرىلىس ماتەريالدارىنا دەگەن سۇرانىس تا ارتىپ كەلەدى. 2025 جىلدىڭ العاشقى 10 ايىنىڭ قورىتىندىسى بويىنشا قازاقستانداعى قۇرىلىس ماتەريالدارى نارىعى شامامەن 2،5 ملرد دوللار دەپ باعالانعان. ونىڭ 70 پايىزى – وتاندىق ءونىم. ەلدە بەتون مەن قۇرىلىستىق قوسپالار، سەمەنت، كەراميكالىق كىرپىش، پليتكا، جىلۋ وقشاۋلاعىش ماتەريالدار، لينولەۋم جانە وزگە دە ونىمدەر وندىرىلەدى.
دەگەنمەن كەيبىر باعىتتاردا يمپورتقا تاۋەلدىلىك ساقتالىپ وتىر. اتاپ ايتقاندا، سانيتارلىق فايانس پەن ليفت جابدىقتارى ازىرگە كەڭ كولەمدە وندىرىلمەيدى. الايدا قۇرىلىس كولەمىنىڭ تۇراقتى ءوسۋى بۇل سەگمەنتتەردىڭ دە بىرتىندەپ دامۋىنا مۇمكىندىك بەرەدى.
قازىرگى كەزدە ەلدە ءبىرقاتار جاڭا وندىرىستىك جوبالار ىسكە اسىرىلۋدا. الماتىدا جىلىنا 162 مىڭ تەكشە مەتر گازوبەتون بلوكتارىن شىعاراتىن ءوندىرىس ىسكە قوسىلۋدا. استانادا 1 ملن تەكشە مەتر مينەرالدى پليتا جانە 1،8 ملن شارشى مەتر سەندۆيچ-پانەل وندىرەتىن زاۋىتتار ىسكە قوسۋ جوسپارلانعان.
بۇل جوبالار جاڭا جۇمىس ورىندارىن اشىپ قانا قويماي، قۇرىلىس سالاسىن قاجەتتى ماتەريالدارمەن تۇراقتى قامتاماسىز ەتۋگە ىقپال ەتەدى. سونىڭ ناتيجەسىندە تۇرعىن جانە وندىرىستىك نىسانداردى سالۋدا قازاقستاندىق ءونىمنىڭ ۇلەسى ارتا تۇسۋدە.
قۇرىلىس سالاسى بۇگىندە ىشكى نارىققا باعىتتالعان ناقتى ءوندىرىستىڭ دامۋىن كورسەتەتىن ماڭىزدى مىسالعا اينالدى. ونىڭ ناتيجەسى – ەل ەكونوميكاسىنىڭ نىعايۋى مەن ازاماتتاردىڭ تۇرمىس ساپاسىنىڭ جاقسارۋى.
