Almaty oblysy Jambyl aýdany Úlken aýyly mańynda qýattylyǵy 2–2,8 GVt bolatyn atom elektr stansıasyn salý máselesi talqylanyp jatyr, dep habarlaıdy Dalanews.kz.
Mınıstrlik ókilderiniń málimetinshe, ıadrolyq tehnologıa jetkizýshi áleýetti kompanıalarmen kelissózder júrgizilip jatyr. Sonymen qatar usynystardy básekelestik negizde qarastyratyn úkimetaralyq komısıa qurylǵan.
“Balamaly jáne jańartylatyn energıa kózderin, sondaı-aq gaz generasıasyn engizý elektr energıasyn tutynýdaǵy kómir generasıasynyń úlesin aıtarlyqtaı azaıtýǵa múmkindik beredi”, – delingen QR Energetıka mınıstrligi taratqan habarlamada.
Jospar boıynsha, 2035 jylǵa qaraı kómirqyshqyl gazy qaldyqtaryn jylyna 44 mln tonnaǵa azaıtý kózdelgen.
“Qazirgi tańda energıa kózderi shtattyq rejımde jumys istep tur, al jylytý maýsymy turaqty túrde ótip jatyr. Júzege asyrylyp jatqan barlyq joba alǵashqy resýrstarmen jetkilikti deńgeıde qamtamasyz etilgen”, – dep tolyqtyrdy vedomstvo.
Aıta keteıik, 2 qyrkúıekte Qasym-Jomart Toqaev Qazaqstanda atom elektr stansıasyn salý boıynsha referendým ótkizý týraly Jarlyqqa qol qoıdy.
Al referendým boıynsha daýys berý 6 qazanda ótti. Bul rette AES salýdy daýys bergenderdiń 71,12 paıyzy qoldady. Referendýmǵa daýys berý tizimine 12,3 mıllıonǵa jýyq qazaqstandyq engizilgen.
Buǵan deıin Toqaev sheteldik ınvestorlar keńesiniń 36-shy plenarlyq otyrysynda Qazaqstan AES qurylysy úshin halyqaralyq konsorsıým qurý máselesin pysyqtap jatqanyn málimdegen edi.
“Bizdiń elimiz ıadrolyq otyn sıkli aıaqtalǵan derlik álemdegi eń iri ýran óndirýshi sanalady. Ózderińiz de biletindeı, jaqynda ótken jalpyulttyq referendýmda Qazaqstanda alǵashqy atom elektr stansıasynyń qurylysy maquldandy. Bul bizdiń energetıkalyq qaýipsizdigimizge uzaq merzimdi ınvestısıa sanalady. Qazirgi ýaqytta biz osy joba úshin halyqaralyq konsorsıým qurý máselesin pysyqtap jatyrmyz”, — dedi Qasym-Jomart Toqaev.
Qazaqstan yqtımal tehnologıa jetkizýshisi retinde tórt kompanıany qarastyryp jatyr. Olar, reseılik "Rosatom", Qytaıdyń CNNC, Koreıanyń KHNP jáne Fransıanyń EDF kompanıalary.
Eske salaıyq, Reseıdiń Syrtqy ister mınıstri Lavrov ta Qazaqstanda birinshi atom elektr stansıasyn salý jónindegi halyqaralyq konsorsıýmǵa qatysýǵa daıyn ekenin málimdegen edi.
"Reseı kómektesýmen ǵana shektelmeı, AES qurylysyna qatysty usynystaryn da daıyndap qoıdy. Biz Qazaqstanda ótken referendýmdy muqıat baqylap, prezıdent Toqaevtyń atom energetıkasyn damytý josparlaryna qoldaý kórsettik. "Rosatom" osy máselede qazaqstandyq dostarymyzben birlesip jumys isteýge tolyq daıyn. Sondaı-aq basqa memleketterdiń tıisti agenttikterimen jáne qurylymdarymen yntymaqtasýǵa ashyqpyz", – dedi Lavrov.
