Qazaqstanda qoi eti sońǵy bir jylda aitarlyqtai qymbattady. 2025 jyldyń qorytyndysy boiynsha elde qoi etiniń baǵasy 29%-ǵa ósip, bir tonnasynyń quny 1,3 mln teńgege jetken. Bul rette Qazaqstan Birikken Arab Ámirlikterine halal et eksportyn da kóbeitip jatyr, dep habarlaidy dalanews.kz.
Ulttyq statistika biýrosynyń málimetinshe, 2026 jyldyń naýryzynda eldegi qoi men eshki sany 23,17 mln basty quraǵan. Al 1975 jyldyń sońynda bul kórsetkish 34,6 mln bolǵan. Keńes dáýirinde Qazaqstan qoi sharýashylyǵy jaqsy damyǵan iri respýblikalardyń biri sanaldy. Tipti mal basyn 50 mln-ǵa deiin jetkizý jospary da bolǵanymen, bul maqsat oryndalmaǵan.
Resmi derekterge sáikes, 2001 jyly bir tonna qoi eti 88,3 myń teńge tursa, qazir onyń baǵasy 1,3 mln teńgege jetken. Osylaisha, 25 jyl ishinde quny 14 eseden astam ósken. 2026 jyldyń naýryzyndaǵy esep boiynsha tiri qoidyń ortasha baǵasy 86,3 myń teńgeni qurady. Eń joǵary baǵa Jambyl oblysynda tirkelgen — bir qoidyń quny 112 myń teńgeden asady. Al Batys Qazaqstan oblysynda shamamen 63,5 myń teńge deńgeiinde.
Sarapshylardyń aitýynsha, bir qoidy kútip-baǵýǵa ai saiyn orta eseppen 9 myń teńge jumsalady. Sonyń saldarynan bir jyldyq shyǵyn 100 myń teńgeden asady. Al 400 basqa arnalǵan sharýashylyqtyń ózin-ózi aqtaý merzimi úsh jyldan da kóp bolýy múmkin.
Qazaqstan sońǵy jyldary BAÁ-ge qoi etin belsendi eksporttai bastady. Qazir Ámirlikterge apta saiyn shamamen 7 tonna salqyndatylǵan qoi eti jóneltiledi. Bolashaqta bul kólemdi 10 tonnaǵa deiin jetkizý josparlanyp otyr.
2025 jyldyń qorytyndysy boiynsha Qazaqstannyń BAÁ-ge eksporty 132,9 mln dollar bolǵan. Onyń shamamen 55%-yn qoi eti quraidy. Sarapshylar Parsy shyǵanaǵy elderinde halal etke suranys turaqty túrde joǵary ekenin aitady.
Táýelsiz sarapshy Erlan Karimovtyń pikirinshe, qoi etiniń qymbattaýyna jem-shóp, janarmai jáne logistika baǵasynyń ósýi áser etken. Sonymen qatar ishki naryqtaǵy deldaldardyń kóptigi men maýsymdyq suranys ta baǵanyń kóterilýine sebep bolyp otyr.
Onyń aitýynsha, eksport kóbine kóterme jáne uzaqmerzimdi kelisimsharttar arqyly júzege asady. Sondyqtan syrtqy naryqtaǵy baǵa kei jaǵdaida ishki bólshek saýdadan tómen bolýy múmkin. Buǵan qosa, qazaqstandyq óndirýshiler Avstraliia, Úndistan jáne Pákistan siiaqty eldermen básekege túsip jatyr.
Sarapshy baǵany turaqtandyrý úshin eksportqa ýaqytsha shekteý engizý, jem-shópti sýbsidiialaý, óńirlik bordaqylaý ortalyqtaryn ashý jáne qoi sharýashylyǵyna jeńildetilgen nesie berý qajet dep esepteidi.
