Májilis depýtattary bastamashylyq etken «Psihologiialyq qyzmet týraly» zań jobasy ekinshi oqylymda qaralyp jatyr. Qujat kásibi psihologiialyq qyzmet kórsetý salasyn quqyqtyq turǵydan retteýge jáne biryńǵai talaptar qalyptastyrýǵa baǵyttalǵan, dep habarlaidy dalanews.kz.
Zań jobasy týraly Májilis depýtaty ári jumys tobynyń jetekshisi Aqmaral Mysyrálimova baiandady.
Onyń aitýynsha, qujat alǵash ret psihologiialyq qyzmet kórsetý salasyndaǵy biryńǵai quqyqtyq negizdi qalyptastyrýdy kózdeidi.
«Zań jobasy kásibi psihologiialyq qyzmetti retteýdiń biryńǵai quqyqtyq negizin qalyptastyrýǵa baǵyttalǵan», - dedi depýtat.
Jumys tobynyń qaraýy barysynda zań jobasy birqatar jańa normalarmen tolyqtyrylǵan. Atap aitqanda, onlain-platformalar arqyly psihologiialyq kómek kórsetý tártibi naqtylanyp, mundai qyzmet kórsetetin sýbektilerge qoiylatyn talaptar belgilengen.
Sonymen qatar psihologtardyń kásibi etikasyn saqtaý máselesine erekshe nazar aýdarylǵan. Zań jobasynda psihologtyń Ádep kodeksin saqtaý mindeti engizilip, mamandardyń biryńǵai tizilimin júrgizý jáne odan shyǵarý tártibi reglamenttelgen.
«Jumys barysynda zań jobasy psihologtyń Ádep kodeksin saqtaý boiynsha talaptarmen, sondai-aq psihologtar tizilimin engizý jáne tizilimnen shyǵarý tártibin retteitin normalarmen tolyqtyryldy», - dedi Mysyrálimova.
Zań jobasyndaǵy mańyzdy jańalyqtardyń biri – adamnyń psihikasyna áser etetin keibir tásilderge shekteý qoiý. Qujatta psihikaǵa belsendi áser etetin zattardy jáne adamnyń sanasyna yqpal etetin ádisterdi qoldanýǵa tyiym salý qarastyrylǵan.
Depýtattyń sózinshe, jumys toby sondai-aq zań tehnikasyn jetildirýge jáne qujattyń mazmunyn naqtylaýǵa baǵyttalǵan redaktsiialyq túzetýler engizgen.
Májilistiń barlyq komitetteri zań jobasy boiynsha oń qorytyndy bergen. Qorytyndy salystyrmaly keste 39 qabyldanǵan túzetýden turady.
Qujat qabyldanǵan jaǵdaida Qazaqstanda psihologtardyń qyzmetine qoiylatyn talaptar naqtylanyp, azamattarǵa kórsetiletin psihologiialyq kómektiń sapasy men qaýipsizdigin arttyrýǵa múmkindik beredi.
