Prezident Qasym-Jomart Toqaev "Psihologiialyq qyzmet týraly" zańǵa qol qoidy. Bul týraly Aqordanyń baspasóz qyzmeti habarlady.
Zańnyń tolyq mátini resmi baspasózde jariialanady.
Buǵan deiin aitylǵandai, qujattyń basty maqsaty – Qazaqstanda psihologiialyq qyzmet kórsetýdiń quqyqtyq, uiymdyq jáne ádeptik negizderin naqtylaý.
Jańa zańǵa sáikes, psiholog retinde jumys isteitin mamandarǵa birqatar talap qoiylady. Atap aitqanda, olardyń joǵary nemese joǵary oqý ornynan keiingi pedagogikalyq ne meditsinalyq bilimi bolýy kerek. Sonymen qatar mamandar joǵary jáne joǵary oqý ornynan keiingi bilim berý uiymdarynda keminde 900 saǵattyq qaita daiarlaýdan ótip, biliktiligin rastaýǵa mindetti.
Budan bólek, psihologtar memlekettik tirkeýge turýy tiis. Osy maqsatta elde psihologtardyń memlekettik tizilimi qurylady. Mamandardy tirkeý tártibin kásibi biliktilikti taný salasyndaǵy ýákiletti organ bekitedi.
Zańda psihologtardyń qyzmetine qatysty shekteýler de qarastyrylǵan. Máselen, olarǵa meditsinalyq diagnostika júrgizýge, dári-dármekpen em taǵaiyndaýǵa, psihobelsendi zattardy nemese adamnyń sanasyna áser etetin ózge de ádisterdi qoldanýǵa tyiym salynady.
Sondai-aq psihologtar kámeletke tolmaǵan balalarmen ata-anasynyń nemese zańdy ókiliniń habardar etilgen kelisiminsiz jumys istei almaidy. Alaida bul talap bilim berý uiymdaryndaǵy jumysqa, sondai-aq zańnamaǵa sáikes kómek kórsetiletin tótenshe jáne daǵdarystyq jaǵdailarǵa qoldanylmaidy.
Kez kelgen psihologiialyq jumys bastalmas buryn klient óziniń habardar etilgen kelisimin berýi qajet.
Zań talaptaryn buzǵan psihologtarǵa aiyppul salynady.
