Qazaqstannyń turǵyn úidi jalǵa berý naryǵynda baǵa ósimi jalǵasýda. Krisha.kz derekterine sáikes, tamyz aiynda elimizdiń kóptegen qalalarynda páter jaldaý quny aitarlyqtai qymbattaǵan, dep habarlaidy dalanews.kz.
Shilde aiynyń sońynan tamyzdyń sońyna deiingi aralyqta barlyq sanattaǵy baspananyń jaldaý aqysy ósken. Eń joǵary ósim eki bólmeli páterlerde tirkeldi – olardyń ortasha quny bir aida 13 paiyzǵa artqan. Bir bólmeli páterlerdiń baǵasy 11 paiyzǵa, al úsh bólmeli baspanalar 10 paiyzǵa qymbattaǵan.
Sarapshylardyń aitýynsha, jaldaý naryǵyndaǵy bul ózgeris tek Astana men Almaty siiaqty iri qalalarǵa ǵana tán emes. Baǵanyń ósýi óńirlik ortalyqtardyń kópshiliginde baiqalǵan.
Kei óńirlerde baǵa tórtten birge deiin kóterilgen
Birqatar qalalarda páter jaldaý quny bir aidyń ishinde 20 paiyzdan astam ósken. Máselen, Qaraǵandy, Qostanai jáne Pavlodar qalalarynda eki bólmeli páterlerdiń ortasha jaldaý aqysy 20–26 paiyzǵa ósip, 230–250 myń teńgege deiin jetken. Al Kókshetaýda úsh bólmeli páterlerdiń baǵasy birden 30 paiyzǵa qymbattaǵan. Pavlodarda bir bólmeli páterlerdi jaldaý quny shamamen 29 paiyzǵa artqan.
Astana Almatydan alda
Tamyz aiynda Astana jaldaý baǵasy boiynsha Almatydan ozyq turǵan qalalardyń qatarynda qaldy. Buǵan deiin shilde aiynda elorda alǵash ret bul kórsetkish boiynsha Almatyny basyp ozǵan bolatyn. Qazir Astanada bir bólmeli páterdi jaldaý úshin orta eseppen 250 myń teńge qajet. Almatyda mundai baspananyń ortasha baǵasy 230 myń teńge. Eki qalada da eki bólmeli páterlerdiń ortasha jaldaý quny 350 myń teńge bolsa, úsh bólmeli baspanalar shamamen 500 myń teńgege usynylýda.
Baǵa tómendegen jalǵyz qala
Tamyz aiyndaǵy monitoring nátijesinde jaldaý aqysy arzandaǵan jalǵyz qala – Qonaev boldy. Bul qalada bir bólmeli páterlerdiń baǵasy orta eseppen 10 myń teńgege tómendegen. Al basqa sanattaǵy turǵyn úilerdiń jaldaý quny aitarlyqtai ózgerissiz qalǵan. Osylaisha jańa oqý jyly men iskerlik maýsym qarsańynda turǵyn úige suranystyń artýy jaldaý naryǵyndaǵy baǵanyń ósýine áser etip otyr.
