Qazaqstanda jańa páterge bastapqy jarna jinaý ýaqyty qalaǵa bailanysty shamamen 1,5 jyldan 5 jylǵa deiin sozylýy múmkin. Orta eseppen el boiynsha bul merzim 3 jyl 8 ai, alaida óńirler arasynda aiyrmashylyq aitarlyqtai, dep habarlaidy Dalanews.kz.
Mysaly, Jezqazǵan men Aqtaý qalalarynda bastapqy jarnany eki jylǵa jeter-jetpes ýaqytta jinaýǵa bolady. Al Shymkent, Taraz jáne Túrkistan turǵyndaryna bul úshin shamamen bes jyl qajet.
Esepteýler iri qalalar boiynsha 60 sharshy metrlik páterdiń 30% bastapqy jarnasyn jinaýǵa ketetin ýaqytqa negizdelgen. Baǵalaý kezinde ortasha jalaqy, BJZQ men áleýmettik tólemder, salyqtar, kúnkóris deńgeii jáne jańa turǵyn úidiń ortasha baǵasy eskerilgen. Bul rette jinaqtyń tabystylyǵy men otbasy músheleriniń sany esepke alynbaǵan.
Sonymen qatar, Qarjy naryǵyn retteý jáne damytý agenttigi men Qazaqstan Ulttyq banki ipoteka mólsherlemesin bastapqy jarna kólemine bailanystyrýdy josparlap otyr. Eger bastapqy jarna 30%-dan tómen bolsa, mólsherleme shamamen 25%-ǵa deiin jetýi múmkin. Al 30% jáne odan joǵary bolsa, paiyzdyq mólsherleme tómen bolady.
