Qazir Abaı okrýginde júzim jınaý naýqany aıaqtalýǵa jaqyn. Óńirdegi eń iri «Maharam» sharýa qojalyǵy egis alqabynyń ár gektarynan 25 sentnerge deıin ónim alýda. Júzimniń «Taıfy» sortynan jınalǵan ónimniń basym bóligi Reseıge jóneltilip jatyr.
Jalpy atalǵan qojalyqta 42 gektar jerge júzim egilgen. Sonyń 26 gektary ónim berse, qalǵan 16 gektary aldaǵy eki jylda jemisin bere bastaıdy.
Qojalyq tóraǵasy Maharam Nıftalıevtiń aıtýynsha, 1 gektarǵa shamamen 2 mıllıon teńgege jýyq shyǵyn ketedi eken. 50 jylǵa jýyq ónim berýge qaýqarly júzim baqtary jalpy ketken shyǵyndy 5-6 jylda tolyǵymen aqtaıtyn kórinedi. Qazirgi tańda ondaǵy júzimniń bir kelesi 120 teńgeden saýdalanyp otyr. Júzimdik alqabynda 30 adam jumys isteıdi.
Jalpy sońǵy 3 jylda Túrkistan oblysy boıynsha jemis-jıdek pen júzimniń egis kólemi 1,8 myń gektarǵa artyp, egis kólemi 30 myń gektarǵa jetken. Onyń ishinde jemis – 19,5 myń gektar, júzim – 10,5 myń gektardy quraıdy. Aǵymdaǵy jyly 85 myń tonna jemis-jıdek jáne 70 myń tonna júzim jınaý josparlanyp otyr. Aıta keterligi, respýblıkada óndirilgen júzimniń 72,5 paıyzy Túrkistan oblysynyń enshisinde.
Túrkistan oblysy ákiminiń baspasóz qyzmeti
