Qazaqstan mektepterinde oqýshylardyń smartfon qoldanýyna tolyq tyiym salý josparlanyp otyr. Mundai túzetý pedagog mártebesi men bilim berý máselelerine qatysty zań jobasynda qarastyrylǵan, dep habarlaidy Dalanews.kz.
Qazir ár mekteptiń ákimshiligi oqýshylarǵa smartfondy qai jaǵdaida qoldanýǵa ruqsat beriletinin ózi anyqtaidy. Zań boiynsha tyiym tek sabaq kezinde kúshinde, al úziliste telefon paidalanýǵa bolady. Qurylǵy oqý úderisine qajet bolsa, muǵalimniń sheshimimen qoldanýǵa ruqsat etiledi.
Zań jobasynyń salystyrmaly kestesine sáikes bul normany alyp tastap, oqýshylardyń gadjet paidalaný tártibin aiqyndaý quqyǵyn bilim berý salasyndaǵy ýákiletti organǵa berý usynylǵan. Bul mindetti Qazaqstan Respýblikasy Oqý-aǵartý ministrligi nemese óńirlik bilim basqarmalary atqarýy yqtimal.
Depýtattar "Bilim alýshylardyń quqyqtary men mindetteri" týraly 47-bapty mynadai redaktsiiada usyndy:
"Orta bilim berý uiymdarynda oqý úderisi kezinde bilim alýshylar men tárbielenýshilerdiń uialy bailanys qurylǵysyn paidalanýyna jol berilmeidi. Bilim berý salasyndaǵy ýákiletti organ bekitken orta bilim berý uiymdarynda uialy bailanys qurylǵysyn paidalaný qaǵidalarynda kózdelgen jaǵdailar buǵan kirmeidi".
Túzetýdiń negizdemesinde uialy bailanysty tek sabaqta emes, úzilis kezinde de shekteý kiberbýlling pen ziian kontent táýekelin azaitýǵa, mekteptegi tártip pen qaýipsizdikti kúsheitýge, oqýshylardyń tikelei qarym-qatynasyn arttyrýǵa jáne salaýatty bilim berý ortasyn qalyptastyrýǵa yqpal etetini aitylǵan.
