Qazaqstanda óndirilgen maqtanyń basym bóligi syrtqa eksporttalady
Túrkistan maqta zaýytynyń direktory Marat Moldymanov elimizdegi maqta óńdeý isimen ailanysatyn kásiporyndardy qajetti shikizatpen qamtamasyz etý máselesi túbegeili sheshemin tappaǵanyn alǵa tartty.
– Jasyratyny joq, bizde shikizatpen qamtý máselesi tolyq sheshilgen emes. Aitalyq bizdiń zaýyt bir jyl boiy úzdiksiz jumys isteýi úshin 3-4 myń tonna maqta kerek. Shikizatty shitinen tazartyp, jýyp, tazalǵannan keiin 800 tonna maqta talshyǵy qalady. Munshama kólemdegi maqtany dál kúzde satyp alyp qoiatyndai qarjylyq resýrsymyz joq. Bul úshin 1,5 mln dollardai qarjy qajet. Negizinen, qajetti shikizatty kúzgi jiyn-terin kezinde satyp alǵan qolaily. Qarjylyq resýrsymyz jetkilikti deńgeide bolmaǵandyqtan, ónim shyǵarýǵa qajetti shikizatty birtindep satyp alýǵa májbúrmiz. Mundai jaǵdaida maqta baǵasy da ala-qula bolatyny jasyryn emes. Qazaqstanda ósirilgen maqtanyń kópshiligi syrt elderge eksporttalatynyn ózińiz de bilesiz, – kókeide júrgen oiyn ortaǵa saldy.
Kórshiles Ózbekstanda sharýanyń 30 gektar jeri bolsa, ol onyń 15 gektaryna maqta, qalǵan jerine ózge kókónis pen daqyldardy egýdi bilik oryndary mindetteidi eken. Osylaisha, Ózbekstan biligi sharýalardan jerdi paidalanbai bos tastaýyna jol bermeidi. Sondyqtan qarapaiym sharýalar ózderine tiisti jerdiń bárin igeredi.
Al kúzgi jiyn-terin kezinde jergilikti bilik oryndary arnaiy kombaindarmen kelip maqtany jinap alyp, ózderi belgilegen baǵamen (ol álemdik naryqtaǵy baǵamen sáikespeýi múmkin) satyp alyp, syrt elderge eksporttaidy eken.
Mundai jaǵdaida qazaqstandyq sharýalardyń Ózbekstanmen básekelesýi qiynǵa túsetinin baiqaǵan shyǵarsyz. Bizdińshe, syrttan keletin meditsinalyq maqtaǵa birshama shekteýler engizý kerek. Bul otandyq óndiristiń aiaqqa turýy úshin asa qajet shara dep esepteimin.
Dalanews.kz
