Qazaqstanda múgedektik taǵaiyndaý barysynda jalǵan qujattar qoldaný derekteri anyqtaldy, dep habarlaidy dalanews.kz.
Eńbek jáne halyqty áleýmettik qorǵaý ministrliginiń málimetinshe, múgedektik belgileý, eńbekke qabilettilikti joǵaltý deńgeiin anyqtaý jáne áleýmettik qoldaý sharalaryn taǵaiyndaý boiynsha júrgizilgen monitoring nátijesinde 167 kúmándi jaǵdai tirkelgen.
«Meditsinalyq qujattardy taldaý nátijesinde jalǵandyq belgileri bar 167 fakt anyqtaldy», – delingen habarlamada.
Tekserý barysynda júieli sipattaǵy zańbuzýshylyqtar anyqtalǵan. Atap aitqanda, dárigerlerdiń ártúrli patsientterge birdei mazmundaǵy qujattardy «kóshirip qoiý» arqyly rásimdegeni belgili boldy. Sonymen qatar zerthanalyq nátijeler, anamnez jáne mamandar qorytyndylary tolyqtai sáikes keletin jaǵdailar tirkelgen.
«Qujattarda tek naýqastardyń jeke derekteri men tekserý kúnderi ózgertilip, negizgi mazmuny ózgerissiz qalǵan», – dep habarlady vedomstvo.
Qazirgi ýaqytta barlyq anyqtalǵan derekter boiynsha tiisti sharalar qabyldanýda. 73 jaǵdai boiynsha qaita tekserý júrgizilgen, kúmán týdyrǵan ister boiynsha áleýmettik tólemder ýaqytsha toqtatylǵan.
Ministrlik málimetinshe, zańbuzýshylyqtar rastalǵan jaǵdaida múgedektik taǵaiyndaý týraly sheshimder qaita qaralady.
Barlyq materialdar quqyq qorǵaý organdaryna, onyń ishinde prokýratýra men ekonomikalyq tergep-tekserý departamentterine joldanǵan.
Vedomstvo bul baǵyttaǵy baqylaý jumystary jalǵasatynyn atap ótti.
