Qazaqstanda memlekettik qoldaý alǵan bankterge qatysty jańa talaptar engizilýi múmkin. Qarjy naryǵyn retteý jáne damytý agenttigi bankterdiń memleketten alǵan qarjysyn qaitarý tártibine ózgerister engizýdi usynyp otyr, dep habarlaidy dalanews.kz.
Qazirgi qoldanystaǵy talap boiynsha, eger memlekettik qoldaý alǵan bank aktsionerlerine dividend tóleýge nemese óz aktsiialaryn keri satyp alýǵa sheshim qabyldasa, memleketten alǵan qarajattyń tiisti bóligin úsh ai ishinde qaitarýǵa mindetti. Endi bul merzimdi qaitarylatyn somaǵa qarai saralaý usynyldy.
Atap aitqanda, qaitarylatyn soma 50 mlrd teńgege deiin bolsa, qazirgi úsh ailyq merzim ózgerissiz qalady. Al 50-100 mlrd teńge aralyǵyndaǵy qarajatty qaitarýǵa 12 aiǵa deiin, al 100 mlrd teńgeden asatyn somany óteýge 18 aiǵa deiin ýaqyt berý kózdelgen.
Sonymen qatar negizgi talap ózgermeidi. Iaǵni bank memleketke aktsionerlerge dividend tóleýge nemese óz aktsiialaryn keri satyp alýǵa jumsaǵan qarajat kóleminen kem emes somany qaitarýy tiis.
Agenttik bul ózgerister bankterdiń memleket aldyndaǵy mindettemesin jeńildetpeitinin, tek tólem merzimin ikemdirek etetinin atap ótti. Mundai tásil iri kólemdegi tólemder kezinde bankterdiń ótimdiligine túsetin júktemeni azaityp, qarjy uiymdaryna kapitaldy tiimdirek basqarýǵa múmkindik beredi.
Usynylyp otyrǵan túzetýler qarjylyq turaqtylyǵyn qamtamasyz etý úshin memlekettik biýdjetten, Ulttyq qordan, Ulttyq bankten nemese onyń enshiles uiymdarynan qoldaý alǵan bankterge qatysty bolady.
Qujatta jańa normalardy 2026 jylǵy 1 maýsymnan bastap týyndaǵan quqyqtyq qatynastarǵa qoldaný usynylǵan. Qazirgi ýaqytta joba qoǵamdyq talqylaý kezeńinen ótip jatyr.
