Astana politsiia departamenti Kaspii qubyr konsortsiýmyna (KTK) zaqym kelýine qatysty azamattardyń teris pikir bildirý faktisi boiynsha aldyn ala tergeý bastady. Bul is QR Qylmystyq kodeksiniń 174-baby 1-bólimi (ult aralyq arazdyqty qozdyrý) boiynsha qarastyrylyp otyr, dep habarlaidy Dalanews.kz.
"2025 jylǵy 17 jeltoqsanda Astana qalasy politsiia departamenti azamattardyń Kaspii qubyr konsortsiýmyna qatysty teris pikir bildirý faktisi boiynsha QR QK 174-baby 1-bólimi boiynsha aldyn ala tergeý bastady. Aldyn ala tergeý barysynda, kúdiktilerdi anyqtaý jáne olardyń kinásin dáleldeý sharalary júrgizilip jatyr. Tergeý qorytyndysy boiynsha olardyń áreketterine quqyqtyq baǵa berilip, protsessýaldyq sheshim qabyldanady", - dedi Bas prokýror Berik Asylov depýtat Aidos Sarymnyń saýalyna bergen jaýabynda.
Sonymen qatar ol buǵan deiin QR Bas prokýratýrasy buqaralyq aqparat quraldarynda jalǵan aqparat pen zańǵa qarsy materialdardy taratýǵa jol berilmeitindigi, sondai-aq mundai áreketter úshin qylmystyq jáne ákimshilik jaýapkershilik bar ekeni eskertilgenin aitty. Mundai túsindirý jumystary aimaqtyq prokýrorlar tarapynan turaqty túrde júrgiziledi.
Aitýynsha, Mádeniet jáne aqparat ministrligi de azamattar arasynda, onyń ishinde kóterilgen máseleler boiynsha, túsindirý jumystaryn BAQ arqyly júrgizip jatyr jáne vedomstvo bul týraly ózdiginen habar beredi.
