Qazaqstanda krıptovalúta kartalary qoldanysqa engizilgen. Onymen el azamattary dúkende saýda jasap, esepaıyrysa alady, dep habarlaıdy Dalanews.kz.
"Astana" halyqaralyq qarjy ortalyǵynyń alańynda sıfrlyq aktıvter qyzmetin kórsetetin lısenzıalanǵan provaıderlerdiń (krıptobırjalardyń) ámıandaryna baılanǵan "krıpto-karta" jobasyn júzege asyrý tetigi iske qosyldy.
"Bul tólem kartalary tutynýshyǵa qolma-qol aqshasyz operasıalardy oryndaýǵa múmkindik beredi. Atalǵan sheshim sıfrlyq aktıvterdiń aınalymyn qoldanystaǵy tólem ınfraqurylymyna qaýipsiz ári yńǵaıly túrde biriktirýge jol ashady", delingen Ulttyq Bank habarlamasynda.
Krıptovalúta kartasynda krıptovalúta túrindegi aktıvter saqtalady. Sáıkesinshe, dúkende saýda jasaǵan adamǵa esepaıyrysý úshin krıptovalútany fıattysyna aýystyryp jatýdyń qajeti bolmaıdy.
"Krıptokarta" mehanızmi tólem operasıasy júzege asyrylǵan sátte klıenttiń sıfrlyq aktıvterin AHQO krıptonaryǵynda satý arqyly olardyń qunyn birden "krıptokartaǵa" (klıenttiń bank shotyna baılanǵan standartty tólem kartasy) aýdarýdy kózdeıdi. Iaǵnı, naqty tólem krıptoaktıvter dereý satylǵannan keıin shynaıy aqsha arqyly júrgiziledi. Osylaısha, tólem operasıasy AHQO-nyń lısenzıalanǵan krıpto-provaıderi tarapyndaǵy krıptoámıan balansynyń bir sátte paıdalanylýymen júzege asady. Esep aıyrysýdyń jedeldigi bank pen AHQO krıpto-provaıderi arasyndaǵy krıptofıattyq ıntegrasıa esebinen qamtamasyz etiledi", dep túsindiredi Ulttyq Bank.
Sondaı-aq bıyl Ulttyq Banktiń úılestirýimen naryq qatysýshylary sıfrlyq aktıvter salasynda birqatar pılottyq jobany júzege asyrýdy josparlap otyr, onyń ishinde:
- sıfrlyq aktıvter boıynsha esep aıyrysýda qoldanylatyn, ulttyq valútamen (sonyń ishinde sıfrlyq teńgemen) qamtylǵan steıblkoındardy shyǵarý;
- qarjy aktıvteri men jyljymaıtyn múlikti tokenızasıalaý jáne baǵaly qaǵazdarǵa teńestirilgen tokenderdi shyǵarý;
- sıfrlyq qarjy aktıvteriniń bazalyq qamtamasyz etilýin esepke alý jáne saqtaý júıelerin uıymdastyrý;
- krıptoaktıvtermen aıyrbastaý jáne saqtaý servısterin damytý;
- ózge de ınovasıalyq qarjy servısteri.
Atalǵan bastamalardy júzege asyrý úshin Ulttyq Bank múddeli memlekettik organdarmen birlese otyryp, kepilsiz sıfrlyq aktıvterdiń aınalymyn keńeıtýge jáne sıfrlyq qarjy (qamtamasyz etilgen) aktıvteri úshin retteýshi baza qalyptastyrýǵa múmkindik beretin zańnamalyq túzetýler jobasyn ázirledi.
