Qorǵanys ministrligi áskerge shaqyrý jasyndaǵy azamattarǵa qatysty reidter júrgizýge qatysty túsinik berdi, - dep habarlaidy Dalanews.kz Qorǵanys ministrligine siltep.
Buqaralyq aqparat quraldary men áleýmettik jelilerde jastardy eriksiz ustap alyp, jergilikti áskeri basqarý organdaryna jetkizip jatqan beinematerialdar tarai bastaǵan.
Osyǵan bailanysty Qorǵanys ministrligi jylyna eki ret (kóktemgi jáne kúzgi áskerge shaqyrý) júzege asyrylatyn áskeri qyzmetke shaqyrýdyń qoldanystaǵy tártibin túsindirýge ókiletti.
Shaqyrý naýqandary barysynda keibir azamattardyń áskeri qyzmetten jaltaryp, jergilikti áskeri basqarý organdaryna ýaqytyly kelmeý faktileri baiqalady.
Sonymen qatar, áskerge shaqyrý jasyndaǵy azamattardy esepke alýda da qiyndyqtar týyndaidy. Óitkeni olardyń kópshiligi tirkelgen jerinde turmaidy. Al qonys aýdarǵan jaǵdaida jańa turǵylyqty mekenjaiyna tirkelmeidi.
Qoldanystaǵy zańnamaǵa sáikes shaqyrý qaǵazyn áskerge shaqyrylýshynyń jeke ózine tapsyrý múmkin bolmaǵan kezde onyń kelýin qamtamasyz etý ishki ister organdaryna júkteledi.
Reid kezinde keibir azamattar ishki ister organdary qyzmetkerleriniń zańdy talaptaryna baǵynbai, qarsylyq kórsetip jatady. Mundai jaǵdaida politsiia qyzmetkerleri olardy májbúrli túrde ustap, shaqyrý pýnktine jetkizýdi júzege asyrýǵa quqyly.
Shaqyrý komissiiasy jetkizilgen adamdardyń mártebesin sol jerde anyqtaidy. Merzimdi áskeri qyzmetke shaqyrýǵa negiz bolmaǵan jaǵdaida olardy úiine jiberedi. Al shaqyrýǵa negiz bolsa, meditsinalyq komissiiadan ótýge jáne shaqyrý sheńberindegi basqa da is-sharalardy ótkizýge jiberedi.
Eske salaiyq, merzimdi áskeri qyzmetke shaqyrýdan jaltarǵany úshin zańnamada ákimshilik jáne qylmystyq jaýapkershilik qarastyrylǵan.
