Qazaqstanda koloniiada dúniege kelgen balalardyń týý týraly kýáliginde olardyń qylmystyq-atqarý júiesi mekemesinde týǵany kórsetilmeitin boldy. Tiisti túzetýlerdi Senat eki oqylymda qabyldady, dep habarlaidy dalanews.kz.
Senator Marat Qojaevtyń aitýynsha, jańa norma balanyń quqyqtaryn qorǵaýǵa jáne onyń bolashaqta stigmaǵa ushyraýyna jol bermeýge baǵyttalǵan.
«Bala qylmystyq-atqarý júiesi mekemesinde dúniege kelgen jaǵdaida, bul mekeme týý týraly kýálikte kórsetilmeidi», - dedi Qojaev Senat otyrysynda.
Atalǵan ózgeris Qylmystyq, Qylmystyq-protsestik, Qylmystyq-atqarý kodeksterine jáne Ákimshilik quqyq buzýshylyq týraly kodekske engizilgen túzetýler aiasynda qarastyrylǵan.
Sonymen qatar zańda áielderdiń jazasyn óteý jaǵdailaryn izgilendirýge baǵyttalǵan birqatar jańa normalar kózdelgen. Atap aitqanda, ortasha jáne eń joǵary qaýipsizdik mekemelerinde otyrǵan áielderdiń azyq-túlik satyp alý, sálemdeme men posylka alý, sondai-aq jaqyndarymen kezdesý quqyqtary keńeitiledi.
Senatordyń sózinshe, jańa túzetýler áielderdi ustaý jaǵdailaryn jaqsartýǵa jáne qylmystyq-atqarý júiesin odan ári izgilendirýge múmkindik beredi.
«Jańa normalar áielderdiń azyq-túlik satyp alý, sálemdemeler men berilimderdi alý, sondai-aq kezdesýlerdiń sany men merzimdiligine qatysty quqyqtaryn naqtylaidy. Bul erejeler qylmystyq-atqarý júiesi mekemelerindegi áielderdiń jaǵdaiyn jaqsartady», - dedi Marat Qojaev.
