23 qarashadan bastap jol erejelerine engizilgen ózgerister kúshine enedi. Dalanews.kz tilshisi Ishki ister ministrligi qandai jańashyldyq engizgenine sholý jasady.
Jyldamdyqty shekteý
10 qarashada jol júrisi erejelerine ózgerister men tolyqtyrýlar engizildi. Ózgerister 23 qarashadan bastap kúshine enedi.
Eldimekenderde júk kólikteriniń jyldamdyǵy saǵatyna 50 shaqyrymǵa deiin shekteldi. Bul shekteý jol belgilerimen naqty jyldamdyq kórsetilgen ýchaskelerge qoldanylmaidy (mysaly, 80-90 km/saǵ).
Jyldamdyqty tómendetý – jaiaý júrginshilerdiń qaza bolý qaýpin azaitýǵa baǵyttalǵan. BUU Dúniejúzilik densaýlyq saqtaý uiymynyń málimetinshe, jyldamdyq 60–65 km/saǵ bolǵanda jaiaý júrginshiniń qaza bolý yqtimaldyǵy 50 km/saǵ-pen salystyrǵanda 4,5 ese joǵary. Kóriný nasharlaǵan kezde (boran, tuman, qar, jańbyr) jol-kólik oqiǵalarynyń aldyn alý maqsatynda kolonna júrisi kezindegi politsiia qyzmetkerleri men jol júrisine qatysýshylardyń quqyqtary men mindetteri naqtylandy. Patrýldik kólik quraldary ilesip júretin kolonnalarǵa qatysty talaptar da jańartyldy.
Mysaly:
- kolonna ishinde manevr jasaýǵa, basyp ozýǵa nemese ózdiginen toqtaýǵa tyiym salynady;
- kólik tizbegindegi kólik sany 10-nan assa, eki patrýldik kólikpen ilesip alyp júrý mindetti;
- M2 jáne M3 sanatyndaǵy barlyq avtobýsqa jolaýshylardy otyrǵyzý jáne túsirý úshin aialdamalarda toqtaýǵa ruqsat etildi.
Iri kólemdi jáne qaýipti júkterdi, velosipedshiler toptaryn, sondai-aq balalardy tasymaldaityn avtobýstardy ilesip alyp júrý kezinde jyldam alynatyn (magnitti) bekitpesi bar qyzǵylt sary nemese sary tústi jarqyldaýyq maiaktardy ruqsatsyz qoldanýǵa bolady. Buǵan deiin mundai maiaktardy paidalaný úshin ruqsat qujattaryn alý, qaita jabdyqtaý rásiminen ótý jáne tehnikalyq kýálikke belgi engizý talap etiletin. Sondai-aq jol paraǵyn elektrondy túrde qoldanýǵa ruqsat berildi. Vizýaldy qabyldaýdy jaqsartý maqsatynda barlyq sýretter, jol belgileri men jol tańbalary tsifrlandyryldy.
Patrýl qyzmeti
10 qarashadaǵy buiryqpen IIM ministri politsiia qyzmetkerleriniń patrýldik-qaraýyl qyzmetin atqarý nusqaýlyǵyna ózgerister engizdi. Qujat eldi mekenderde jáne qalaaralyq avtomobil joldarynda qoǵamdyq tártip pen jol qaýipsizdigin qamtamasyz etetin patrýldik-qaraýyl qyzmetiniń tártibin naqtylaidy.
Atap aitqanda, patrýldik-qaraýyl qyzmetiniń jol qozǵalysy erejelerin buzýdy anyqtaý tártibi tómendegidei naqtylandy:
- jaiaý patrýldeý kezinde jáne patrýldik avtokólik (mototsikl) bekitilgen turǵan oryndarda júzege asyrylady.
Mundai jaǵdaida kólikti toqtatý júrgizýshige túsinikti jáne avariialyq jaǵdai týǵyzbaityndai etip, qolmen iaki jezlmen kóliktiń baǵytyna qarai belgi berý, sondai-aq bir mezgilde ysqyryqpen belgi jasaý arqyly oryndalady.
Osylaisha, politsiia qyzmetkerlerine qaitadan kólik aǵynynan mashinalardy toqtatýǵa ruqsat berildi. Buǵan deiin tek kólik aǵynynda patrýldeý tásiline basymdyq berilgen bolatyn.
Mastyqty tekserý
16 qyrkúiekten bastap júrgizýshilerdiń masańdyǵyn tekserýdiń erejeleri jańartyldy. Bul erejeler Ákimshilik quqyq buzýshylyq kodeksiniń 796-baby boiynsha júrgiziletin ákimshilik óndiristiń aiasynda ǵana qoldanylady. Bul norma basqarý quqyǵynan ýaqytsha aiyrý jáne masań kúide bolatyn júrgizýshilerdi ǵana tekserýdi kózdeidi.
Sondyqtan jańartylǵan erejeler tek kólik quralyn basqarýshylarǵa qatysty. Jaiaý júrginshiler men jol júrisiniń basqa qatysýshylaryna jańa talaptar engizilgen joq.
Sondai-aq protsedýranyń ózi burynǵy qalpynda qalyp otyr - túpkilikti ózgerister joq. Bir ǵana jańalyq - bekitilgen nysannyń túri: buryn erejeler Úkimet qaýlysymen bekitilgen bolsa, endi olar IIM buiryǵy arqyly bekitiledi.
Bul detsentralizatsiia jáne biýrokratiiadan qutylý saiasatynyń aiasynda jasaldy, osylaisha mundai qujattardy qabyldaý tártibin ońailatýǵa múmkindik beredi. Sonymen qatar júrgizýshi arnaiy quraldarmen, máselen alkotestermen masańdyq dárejesin tekserýden bas tartýǵa nemese meditsinalyq uiymynda tekserýdi jalǵastyrýǵa quqyly ekenin eske salamyz.
Óz kezeginde, masańdyqtan tekserýden jaltarý nemese bas tartý QR ÁQBtK-niń 613-babynyń 4-bóliginde kózdelgen ákimshilik is júrgizýdi qozǵaý úshin negiz bolady.
