Qazaqstandyq Allur avtokólik kompaniiasy el naryǵynda MG (Morris Garages) markaly avtokólikterdi jergilikti jerde óndirý men satýdy iske qosqanyn jariialady. Almatyda ótken brendtiń resmi tanystyrylymynda onyń damý jospary, sondai-aq elimizde servistik jáne dilerlik infraqurylymdy qalyptastyrý baǵyttary tanystyryldy, dep habarlaidy Dalanews.kz.
Joba Allur men Qytaidyń iri avtokólik óndirýshisi ári álemdik kóshbasshylardyń biri - SAIC Motor arasyndaǵy strategiialyq seriktestiktiń jalǵasy boldy. Yntymaqtastyq týraly kelisim 2025 jyly Shanhaida ótken 21-shi halyqaralyq avtosalon aiasynda jasalyp, taraptar MG brendin Qazaqstanda damytý jáne óndiristi jergiliktendirý jóninde ýaǵdalasqan.
1924 jyly Ulybritaniiada negizi qalanǵan MG brendi búginde SAIC Motor portfeline kiredi jáne halyqaralyq injenerlik murany zamanaýi innovatsiialarmen ushtastyrady. Qazaqstan Ortalyq Aziiadaǵy ónerkásiptik áleýeti joǵary, infraqurylymy damyǵan ári tehnologiialyq avtokólikterge suranysy ósip kele jatqan strategiialyq mańyzdy naryq retinde qarastyrylyp otyr.
"MG brendi Allur portfelin tolyqtyryp, qazaqstandyq tutynýshylarǵa sapaly ári qoljetimdi avtokólikter tańdaýyn keńeitedi. Biz jappai segmenttegi zamanaýi modelderge turaqty suranysty baiqap otyrmyz jáne teńgerimdi usynys qalyptastyrýdy jalǵastyramyz. Biz úshin brendti tek naryqqa shyǵarý emes, ony óndiristik ekojúiege tolyq engizý - jergiliktendirý, biryńǵai sapa standarttary men damyǵan servistik infraqurylym arqyly uzaq merzimdi turaqtylyqty qamtamasyz etý - printsipti mańyzdy", - dedi Allur kompaniiasynyń prezidenti Oksana Holstinina jańa brendtiń mańyzyna toqtalyp.
MG avtokólikterin shyǵarý Qostanaidaǵy Allur zaýytynda jolǵa qoiylady. Bul - eldegi eń iri avtomobil óndiris alańdarynyń biri. Kásiporyn búginde Chevrolet, Kia, JAC, Jetour, Geely Galaxy jáne Skoda brendteriniń kólikterin shyǵarady. Zaýyttyń jyldyq qýaty 125 myń avtokólikke deiin jetedi, al qoldanylatyn robottandyrylǵan jeliler halyqaralyq sapa jáne qaýipsizdik standarttaryna sai.
SAIC Motor ókilderi óndiristi jergiliktendirýdiń mańyzyn jáne Qazaqstannyń MG brendi úshin óńirlik strategiialyq rólin erekshe atap ótti. Kompaniianyń vitse-prezidenti Mo Idiń aitýynsha, Qazaqstant- Ortalyq Aziiada brendti damytýdyń negizgi naryqtarynyń biri.
"MG-di Qazaqstanda damytý uzaq merzimdi strategiiaǵa negizdelgen. Jergilikti óndiris tolyqqandy ekojúie qurýǵa - óndiristen bastap servistik qyzmetke deiin - múmkindik beredi jáne brendtiń óńirdegi pozitsiiasyn nyǵaitady. Biz modelder jelisin jergilikti paidalaný jaǵdaiyna beiimdedik: interfeis qazaq jáne orys tilderinde, qysqy paket engizildi, korroziiaǵa qarsy qorǵanys kúsheitildi. Allur kompaniiasymen seriktestikti joǵary baǵalaimyz jáne MG brendiniń áleýetin birge damytýdy kózdeimiz", - dedi ol.
Jańa brendtiń óndirisi men satylymyn iske qosý bilikti jumys oryndaryn ashýǵa, óndiristik quzyretterdi damytýǵa, ozyq tehnologiialardy engizýge jáne el ekonomikasyna qosymsha serpin berýge baǵyttalǵan.
Qazir Qazaqstan naryǵynda tórt model usynyldy:
- MG 5 - 7 890 000 teńgeden;
- MG ZS - 8 590 000 teńgeden;
- MG HS - 10 690 000 teńgeden;
- MG RX9 - 16 490 000 teńge.
Barlyq modelge 5 jyl nemese 150 000 shaqyrymǵa deiin (qaisysy buryn bolsa) kepildik beriledi.
Búginde Allur kompaniiasy MG brendi boiynsha Qazaqstandaǵy resmi distribiýtor retinde Almaty, Astana, Qostanai, Qaraǵandy, Pavlodar, Semei, Túrkistan, Shymkent, Kókshetaý jáne Aqtóbe qalalarynda 11 dilerlik ortalyqty damytyp otyr. 2026 jyldyń sońyna deiin olardyń sanyn 24-ke jetkizý josparlanǵan.
