قازاقستاندىق Allur اۆتوكولىك كومپانياسى ەل نارىعىندا MG (Morris Garages) ماركالى اۆتوكولىكتەردى جەرگىلىكتى جەردە ءوندىرۋ مەن ساتۋدى ىسكە قوسقانىن جاريالادى. الماتىدا وتكەن برەندتىڭ رەسمي تانىستىرىلىمىندا ونىڭ دامۋ جوسپارى، سونداي-اق ەلىمىزدە سەرۆيستىك جانە ديلەرلىك ينفراقۇرىلىمدى قالىپتاستىرۋ باعىتتارى تانىستىرىلدى، دەپ حابارلايدى Dalanews.kz.
جوبا Allur مەن قىتايدىڭ ءىرى اۆتوكولىك ءوندىرۋشىسى ءارى الەمدىك كوشباسشىلاردىڭ ءبىرى - SAIC Motor اراسىنداعى ستراتەگيالىق سەرىكتەستىكتىڭ جالعاسى بولدى. ىنتىماقتاستىق تۋرالى كەلىسىم 2025 جىلى شانحايدا وتكەن 21ء-شى حالىقارالىق اۆتوسالون اياسىندا جاسالىپ، تاراپتار MG برەندىن قازاقستاندا دامىتۋ جانە ءوندىرىستى جەرگىلىكتەندىرۋ جونىندە ۋاعدالاسقان.
1924 جىلى ۇلىبريتانيادا نەگىزى قالانعان MG برەندى بۇگىندە SAIC Motor پورتفەلىنە كىرەدى جانە حالىقارالىق ينجەنەرلىك مۇرانى زاماناۋي يننوۆاسيالارمەن ۇشتاستىرادى. قازاقستان ورتالىق ازياداعى ونەركاسىپتىك الەۋەتى جوعارى، ينفراقۇرىلىمى دامىعان ءارى تەحنولوگيالىق اۆتوكولىكتەرگە سۇرانىسى ءوسىپ كەلە جاتقان ستراتەگيالىق ماڭىزدى نارىق رەتىندە قاراستىرىلىپ وتىر.
"MG برەندى Allur پورتفەلىن تولىقتىرىپ، قازاقستاندىق تۇتىنۋشىلارعا ساپالى ءارى قولجەتىمدى اۆتوكولىكتەر تاڭداۋىن كەڭەيتەدى. ءبىز جاپپاي سەگمەنتتەگى زاماناۋي مودەلدەرگە تۇراقتى سۇرانىستى بايقاپ وتىرمىز جانە تەڭگەرىمدى ۇسىنىس قالىپتاستىرۋدى جالعاستىرامىز. ءبىز ءۇشىن برەندتى تەك نارىققا شىعارۋ ەمەس، ونى وندىرىستىك ەكوجۇيەگە تولىق ەنگىزۋ - جەرگىلىكتەندىرۋ، ءبىرىڭعاي ساپا ستاندارتتارى مەن دامىعان سەرۆيستىك ينفراقۇرىلىم ارقىلى ۇزاق مەرزىمدى تۇراقتىلىقتى قامتاماسىز ەتۋ - ءپرينسيپتى ماڭىزدى"، - دەدى Allur كومپانياسىنىڭ پرەزيدەنتى وكسانا حولستينينا جاڭا برەندتىڭ ماڭىزىنا توقتالىپ.
MG اۆتوكولىكتەرىن شىعارۋ قوستانايداعى Allur زاۋىتىندا جولعا قويىلادى. بۇل - ەلدەگى ەڭ ءىرى اۆتوموبيل ءوندىرىس الاڭدارىنىڭ ءبىرى. كاسىپورىن بۇگىندە Chevrolet، Kia، JAC، Jetour، Geely Galaxy جانە Skoda برەندتەرىنىڭ كولىكتەرىن شىعارادى. زاۋىتتىڭ جىلدىق قۋاتى 125 مىڭ اۆتوكولىككە دەيىن جەتەدى، ال قولدانىلاتىن روبوتتاندىرىلعان جەلىلەر حالىقارالىق ساپا جانە قاۋىپسىزدىك ستاندارتتارىنا ساي.
SAIC Motor وكىلدەرى ءوندىرىستى جەرگىلىكتەندىرۋدىڭ ماڭىزىن جانە قازاقستاننىڭ MG برەندى ءۇشىن وڭىرلىك ستراتەگيالىق ءرولىن ەرەكشە اتاپ ءوتتى. كومپانيانىڭ ۆيسە-پرەزيدەنتى مو ءيدىڭ ايتۋىنشا، قازاقستانت- ورتالىق ازيادا برەندتى دامىتۋدىڭ نەگىزگى نارىقتارىنىڭ ءبىرى.
"MGء-دى قازاقستاندا دامىتۋ ۇزاق مەرزىمدى ستراتەگياعا نەگىزدەلگەن. جەرگىلىكتى ءوندىرىس تولىققاندى ەكوجۇيە قۇرۋعا - وندىرىستەن باستاپ سەرۆيستىك قىزمەتكە دەيىن - مۇمكىندىك بەرەدى جانە برەندتىڭ وڭىردەگى پوزيسياسىن نىعايتادى. ءبىز مودەلدەر جەلىسىن جەرگىلىكتى پايدالانۋ جاعدايىنا بەيىمدەدىك: ينتەرفەيس قازاق جانە ورىس تىلدەرىندە، قىسقى پاكەت ەنگىزىلدى، كورروزياعا قارسى قورعانىس كۇشەيتىلدى. Allur كومپانياسىمەن سەرىكتەستىكتى جوعارى باعالايمىز جانە MG برەندىنىڭ الەۋەتىن بىرگە دامىتۋدى كوزدەيمىز"، - دەدى ول.
جاڭا برەندتىڭ ءوندىرىسى مەن ساتىلىمىن ىسكە قوسۋ بىلىكتى جۇمىس ورىندارىن اشۋعا، وندىرىستىك قۇزىرەتتەردى دامىتۋعا، وزىق تەحنولوگيالاردى ەنگىزۋگە جانە ەل ەكونوميكاسىنا قوسىمشا سەرپىن بەرۋگە باعىتتالعان.
ءقازىر قازاقستان نارىعىندا ءتورت مودەل ۇسىنىلدى:
- MG 5 - 7 890 000 تەڭگەدەن؛
- MG ZS - 8 590 000 تەڭگەدەن؛
- MG HS - 10 690 000 تەڭگەدەن؛
- MG RX9 - 16 490 000 تەڭگە.
بارلىق مودەلگە 5 جىل نەمەسە 150 000 شاقىرىمعا دەيىن (قايسىسى بۇرىن بولسا) كەپىلدىك بەرىلەدى.
بۇگىندە Allur كومپانياسى MG برەندى بويىنشا قازاقستانداعى رەسمي ديستريبيۋتور رەتىندە الماتى، استانا، قوستاناي، قاراعاندى، پاۆلودار، سەمەي، تۇركىستان، شىمكەنت، كوكشەتاۋ جانە اقتوبە قالالارىندا 11 ديلەرلىك ورتالىقتى دامىتىپ وتىر. 2026 جىلدىڭ سوڭىنا دەيىن ولاردىڭ سانىن 24-كە جەتكىزۋ جوسپارلانعان.
