Elimizde dárigerlerge arnalǵan “Qazaqstannyń eńbek sińirgen dárigeri" ataǵy paida boldy. Atalmysh marapatqa ie bolǵan aqhalatty jandarǵa 1000 AEK kóleminde birjolǵy tólem tólenedi, dep habarlaidy Dalanews.kz.
Parlament májilisi keibir zańnamalyq aktilerge densaýlyq saqtaý máseleleri boiynsha ózgerister engizdi. Zań jobasynda meditsina qyzmetkerleri úshin jańa áleýmettik kepildikter kózdelgen.
Naqtyraq aitsaq, "Qazaqstannyń eńbek sińirgen dárigeri" qurmetti ataǵy engiziledi. Bul ataqqa ie bolǵandar 1000 AEK mólsherinde (biyl 3 692 000 teńge) birjolǵy tólemge ie bolady.
Sonymen qatar jyl saiyn "Óz mamandyǵynyń úzdigi" respýblikalyq konkýrsy ótkizilip turady. Baiqaý jeńimpazy 500 AEK (2024 jyly 1 846 000 teńge) mólsherinde tólem alady.
Qala berdi balabaqshalarda oryn bólý kezinde meditsina qyzmetkerleriniń balalaryna basym quqyq beriledi. Al qyzmettik mindetin atqarý kezinde qaza tapqan nemese múgedek bolyp qalǵan meditsina qyzmetkerleriniń balalary joǵary oqý oryndaryna konkýrstan tys qabyldanady, iaǵni memlekettik bilim granty emtihansyz beriledi.
