Qazaqstanda meditsinalyq qyzmetterdiń baǵasy toqtaýsyz ósip keledi. Energyprom sarapshylarynyń esebinshe, bir jyl ishinde dárigerdiń qarapaiym qabyldaýynyń ózi 22%-ǵa qymbattaǵan, dep habarlaidy Dalanews.kz.
Energyprom dereginshe, jyl basynan beri aqyly meditsinalyq qyzmetter baǵasy ortasha eseppen 16,1%-ǵa kóterilgen. Onyń ishinde eń kóp qymbattaǵany analizder men meditsinalyq tekserýler (21,5%) jáne dárigerlerdiń alǵashqy qabyldaýy (19,5%). Sonymen qatar basqa da qyzmet túrleriniń baǵasy edáýir artqan: tar beiindi mamandardyń keńesi 8,6%-ǵa, stomatologiia qyzmetteri 12%-ǵa ósken.
"Dáriger qabyldaýy, meditsinalyq tekserýler men analizderdiń qymbattaýyna qaramastan, 2025 jyldyń birinshi toqsanynda halyq pen kásiporyndar esebinen kórsetiletin aqyly meditsinalyq qyzmetterden túsetin kiris 1,5%-ǵa azaidy. Buǵan aýrýhanalardyń kirisi bir jylda 39,4%-ǵa kúrt tómendeýi sebep boldy", – deidi sarapshylar.
Kiristiń tómendeýi belgili bir deńgeide memleket pen MÁMS-tiń keibir shyǵyndardy óz moinyna alýymen bailanysty. Iaǵni, qazaqstandyqtar keibir meditsinalyq qyzmetter úshin az tóleýde nemese múlde tólemeitin bolǵan. Bul ózgerister, ásirese perzenthanalarǵa, áielder konsýltatsiialaryna jáne hirýrgiialyq bólimderge kóbirek qatysty. Memlekettik retteýden tys jumys isteitin jeke klinikalardaǵy dárigerlerdiń qyzmeti de qymbattap jatyr. Sonyń saldarynan jekemenshik emhanalar men stomatologiialardyń tabysy artqan: jeke stomatologiialardyń tabysy 48,9%-ǵa ósse, basqa kommertsiialyq meditsinalyq qyzmetterden túsetin tabys 26,1%-ǵa artty.
"Bul ózgerister halyqtyń meditsinalyq qyzmetke jumsaityn shyǵyndaryna áser etti me? Tutastai alǵanda, joq. Qazaqstandyqtar óz densaýlyǵyna jumsaityn aqshany kerisinshe kóbeitken. 2025 jyldyń birinshi toqsanynda otbasynyń aqyly meditsinalyq qyzmetke jumsaǵan shyǵyndary byltyrǵy jyldyń osy kezeńimen salystyrǵanda 28,3%-ǵa ósken. Bir adamǵa shaqqanda, toqsandyq shyǵyn ortasha eseppen 4,6 myń teńgeni quraǵan (ótken jyly bul kórsetkish 3,6 myń teńge bolǵan)", – delingen Energyprom esebinde.
Sonymen qatar elimizdiń keibir óńirlerinde halyq densaýlyqqa ózge aimaqtarǵa qaraǵanda áldeqaida kóp aqsha jumsaidy. Máselen, Shymkentte jan basyna shaqqandaǵy meditsinalyq qyzmet shyǵyny toqsanyna bar-joǵy 1,3 myń teńge bolsa, Astanada 8,9 myń, al Qaraǵandy oblysynda 9,8 myń teńge, bul – eldegi eń joǵary kórsetkish.
Eń qymbat meditsinalyq qyzmet túri – stomatologiia. Onyń baǵasy bir jyl ishinde 26,1%-ǵa ósken. Al aýrýhanalardaǵy aqyly emdeý qyzmetiniń baǵasy tipti bir jarym esege (54,1%) kóterilip ketken.
