Qazaqstanda bir adamǵa kúnine 5 litrden sý berý arqyly shekteý qoiý máselesi kún tártibinde turǵan joq. Bul týraly Sý resýrstary jáne irrigatsiia ministri Nurjan Nurjigitov málimdedi, dep habarlaidy Dalanews.kz.
"Biyldan bastap differentsialdy tarifti engizip jatyrmyz. Nátijesinde, halyq sýdy únemdeýge kóshkenin baiqadyq. Al eger bireý sýdy únemdemese, kóp mólsherde paidalansa – ol kóbirek tóleidi. Demek, oǵan ondai múmkindik berilgen. Sondyqtan bul tásil aýyzsýmen qamtamasyz etý salasyna engizildi. Al siz qoiǵan suraq (Qazaqstanda bir adamǵa sýdy litrmen shekteý engizile me) – ondai másele qaralyp jatqan joq", – dedi ministr májilis kýlýarynda jýrnalister saýalyna jaýap bere otyryp.
Ministrdiń aitýynsha, Qazaqstanda jyl saiyn shamamen 100 milliard tekshe metr sý qalyptasady. Onyń tek 1 milliard tekshe metri ǵana aýyzsý retinde qoldanylady.
"Sondyqtan jańa Sý kodeksinde aýyzsýmen qamtamasyz etý birinshi kezektegi basymdyq retinde belgilendi. Eger bolashaqta sý tapshylyǵy týyndasa, eń aldymen sý aýyzsýmen qamtamasyz etýge baǵyttalady", – dep túsindirdi Nurjan Nurjigitov.
