Qazaqstan Energetika ministrligi benzin, dizel otyny jáne keibir munai ónimderin el aýmaǵynan shyǵarýǵa alty aiǵa jańa tyiym engizdi. Tiisti buiryqqa sáikes, bul shekteý 2025 jyldyń 20 qarashasynan bastap 2026 jyldyń 20 mamyryna deiin kúshinde bolady, dep habarlaidy Dalanews.kz.
Qujatqa sai, atalǵan tyiym avtokólikpen benzin, dizel otyny jáne basqa da munai ónimderin, sonyń ishinde Eýraziialyq ekonomikalyq odaqqa (EAEO) múshe elderge shyǵarýǵa da qoldanylady.
Alaida bul shekteý mailaý materialdaryna, sondai-aq avtokóliktiń zaýyttan ornatylǵan otyn bagynda bir rettik alyp shyǵýǵa jáne aviatsiialyq otyndy ǵylymi-zertteý maqsatynda az kólemde shyǵarýǵa qatysty qoldanylmaidy. Sondai-aq gýmanitarlyq kómek retinde munai ónimderin eksporttaýǵa úkimet sheshimimen ruqsat beriledi.
Buǵan qosa, buiryqta temirjol kóligi arqyly munai ónimderin eksporttaýǵa da ýaqytsha tyiym salynatyny jazylǵan. Bul shekteý tek keibir arnaiy bekitilgen josparlar boiynsha jetkiziletin benzin túrlerine jáne gýmanitarlyq kómek retinde jóneltiletin ónimderge qoldanylmaidy.
Sonymen qatar 2026 jyldyń 1 qańtarynan 30 maýsymyna deiin taǵy bir alty ailyq kezeńge shekteý engiziledi. Bul joly tyiym jeńil distilliattarǵa, aviakerosinge, dizel otynyna, gazoilge, tolýol men ksilolǵa, sondai-aq munai bitýmyna qatysty bolmaq.
Energetika ministrliginiń málimetinshe, mundai sharalar ishki naryqty janarmai tapshylyǵynan qorǵaý jáne baǵanyń turaqtylyǵyn saqtaý maqsatynda qabyldanǵan.
