Qazaqstanda turǵyn úi naryǵyndaǵy belsendilik tómendedi. 2026 jylǵy shildede el boiynsha baspana satyp alý-satýǵa qatysty 37 158 mámile tirkelgen. Bul maýsymmen salystyrǵanda 4,9%-ǵa, al byltyrǵy shildege qaraǵanda 6,5%-ǵa az, dep habarlaidy dalanews.kz.
Ulttyq statistika biýrosynyń málimetinshe, turǵyn úi saýdasy eń qyzý júrgen qalalar - Almaty men Astana. Shildede Almatyda 7 263, Astanada 6 999 mámile jasalǵan. Qaraǵandy oblysynda bul kórsetkish 2 688-ge jetti.
Sonymen qatar birqatar óńirde naryq aitarlyqtai báseńdegen. Bir ai ishinde Mańǵystaý oblysynda mámileler sany 33,7%-ǵa, Qaraǵandy oblysynda 28,7%-ǵa tómendedi.
Kópqabatty úilerdegi páterlerge qatysty 28.575 mámile jasalyp, olardyń satylymy bir aida 2,9%-ǵa azaidy. Satyp alýshylar arasynda eki bólmeli páterlerge suranys joǵary bolǵan. Mundai baspana boiynsha 11 056 mámile tirkelgen.
Jeke úiler naryǵyndaǵy tómendeý budan da joǵary. Shildede 8 583 jeke úi satylyp, mámileler sany bir aida 10,8%-ǵa qysqardy. Eń úlken quldyraý Mańǵystaý oblysynda baiqaldy – jeke úi saýdasy 49%-ǵa azaiǵan.
Jalpy, 2026 jyldyń qańtar-shilde aralyǵynda Qazaqstanda turǵyn úi satyp alý-satý mámileleriniń sany ótken jyldyń sáikes kezeńimen salystyrǵanda 2,6%-ǵa tómendegen.
