Almatyda ata-anasynyń qamqorlyǵynsyz qalǵan jáne jetim balalarǵa arnalǵan tálimgerlik taqyrybyndaǵy alǵashqy respýblıkalyq forým ótti. «Nastavnıkı -Tálimgerler»: Qazaqstan Respýblıkasynda 10 jyl» atty forým balalar úıleriniń tárbıelenýshilerin áleýmettendirýdiń tıimdi quraly retinde tálimgerlikti damytý men qoldaýdy talqylaý úshin memlekettik organdardyń, bıznestiń, ÚEU men halyqaralyq uıymdardyń ókilderin biriktirdi.
Forýmǵa QR Parlamenti Májilisiniń Áleýmettik-mádenı damý komıtetiniń tóraǵasy Ashat Aımaǵambetov; QR Oqý aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova; QR Bala quqyqtary jónindegi ýákil Dınara Zakıeva; Islam Damý Bankin qosa alǵanda, bıznes jáne halyqaralyq uıymdardyń ókilderi qatysty.
İs-shara «Dara» qaıyrymdylyq qorynyń «Tálimgerler» baǵdarlamasynyń 10 jyldyǵyna oraılastyryldy.
Tálimger – bul balalar úıindegi jasóspirimmen tájirıbe bólisetin, oǵan eresek ómir súrý daǵdylaryn ıgerýge kómektesetin, qıyn sátterde qoldaý kórsetetin jáne bolashaqty tańdaýda kómektesetin eresek adam. Tálimger bolý úshin Qazaqstan azamaty arnaıy oqýdan ótip, belgili bir talaptarǵa saı bolýy kerek.
«Qazaqstanda tálimgerlik ınstıtýtynyń damýy memlekettiń, úkimettik emes uıymdardyń jáne belsendi azamattardyń kúsh-jigerin biriktirý arqasynda múmkin boldy. Tálimgerlik ınstıtýtyn bekitý úshin aýqymdy jumys atqaryldy: Bala quqyqtary týraly zańǵa ózgerister engizildi, birneshe normatıvtik-quqyqtyq aktiler qabyldandy. Bul is-shara jaı ǵana oqıǵa emes, ol tálimgerlik ınstıtýtynyń jańa deńgeıge kóterilip, tanylýy men túsiniletinine belgi bolyp tabylady. Búgin munda jınalǵan adamdar túsinedi: dál adamdyq qatysý, qamqorlyq jáne qoldaý balaǵa ómir boıy súıenerlik negiz bola alady», - dedi Balalardy qorǵaý jónindegi komıtettiń tóraıymy Nasymjan Ospanova.
«Dara» qory 2015 jyldan beri júzege asyryp kele jatqan «Tálimgerler» baǵdarlamasy balalar úıiniń tárbıelenýshilerin tálimgerlerimen qaýyshtyryp, sol arqyly balalardy qoldaý men áleýmettendirýdi kózdeıdi. Búginde baǵdarlama Qazaqstannyń 18 qalasynda jumys istep, 360-tan astam jasóspirimge derbes ómirge qadam basýǵa kómektesti. Baǵdarlamanyń aýqymy jyl saıyn keńeıip, qatysýshylar sany artyp keledi.
Baǵdarlama alǵash ret Astana, Almaty jáne Qaraǵandy qalalarynda iske qosyldy. Sol kezde Qaraǵandy oblysy Bilim basqarmasynyń basshysy bolǵan Ashat Aımaǵambetov uzaq jylǵy jumystyń nátıjeleri men tálimgerlikti zańnamalyq deńgeıde bekitý mańyzdylyǵy týraly aıtyp ótti.
«On jyl ishinde biz tálimgerlik jobasynyń turaqty, tıimdi jáne shyn máninde qajetti ekenine kóz jetkizdik. Bul jobany zań deńgeıinde nege bekitý qajet? Eń aldymen árbir taraptyń, barlyq múddeli taraptardyń jaýapkershiligi men quqyqtaryn bekitý úshin. «Tálimgerler» baǵdarlamasynyń tájirıbesi barlyq negizgi aspektilerdi eskerýge múmkindik berdi: kim tálimger bola alady, onyń quqyqtary men mindetteri qandaı, tálimgerler mektebi qalaı jumys isteıdi, sertıfıkattaý máseleleri jáne barlyq taraptardyń, sonyń ishinde memlekettik organdardyń jaýapkershiligi. Baǵdarlamanyń kópjyldyq tájirıbesi zańnamalyq túrde qandaı normalardy bekitý mańyzdy ekenin kórsetti», - dedi Ashat Aımaǵambetov.
Forýmda sondaı-aq tálimgerler men olardyń tálim alýshylarynyń sóz sóıleýleri ótti, onda olar óz dostyqtary týraly áńgimeledi: balanyń senimin qalaı jaýlap alǵandary, onyń áleýetin qalaı ashqandary, ózine senýge kómekteskenderi týraly, sondaı-aq tálim alýshylardyń eresek ómirindegi naqty jetistikterimen bólisti.
««Tálimgerler» baǵdarlamasy – aıqyn ádisteme men kásibı komanda. Biz kóp jetistikke jettik, biraq toqtap qalmaımyz, óıtkeni árbir oǵan muqtaj jasóspirimniń óz tálimgeri bolýy kerek ekenine senimdimiz», - dedi «Dara» qaıyrymdylyq qorynyń negizin qalaýshy Gúlnar Dosaeva.
«Dara» qory 2007 jyldan bastap balalar úıindegi jasóspirimderdi qoldaý men bilim alýda arnaıy qajettilikteri bar balalar úshin bilim aliǵa jaǵdaı jasaý salasynda qaıyrymdylyq jobalaryn iske asyryp keledi.
