الماتىدا اتا-اناسىنىڭ قامقورلىعىنسىز قالعان جانە جەتىم بالالارعا ارنالعان تالىمگەرلىك تاقىرىبىنداعى العاشقى رەسپۋبليكالىق فورۋم ءوتتى. «ناستاۆنيكي -تالىمگەرلەر»: قازاقستان رەسپۋبليكاسىندا 10 جىل» اتتى فورۋم بالالار ۇيلەرىنىڭ تاربيەلەنۋشىلەرىن الەۋمەتتەندىرۋدىڭ ءتيىمدى قۇرالى رەتىندە تالىمگەرلىكتى دامىتۋ مەن قولداۋدى تالقىلاۋ ءۇشىن مەملەكەتتىك ورگانداردىڭ، بيزنەستىڭ، ۇەۇ مەن حالىقارالىق ۇيىمداردىڭ وكىلدەرىن بىرىكتىردى. 

فورۋمعا ق ر پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ؛ ق ر وقۋ اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا؛ ق ر بالا قۇقىقتارى جونىندەگى ۋاكىل دينارا زاكييەۆا؛ يسلام دامۋ بانكىن قوسا العاندا، بيزنەس جانە حالىقارالىق ۇيىمداردىڭ وكىلدەرى قاتىستى.

ءىس-شارا «دارا» قايىرىمدىلىق قورىنىڭ «تالىمگەرلەر» باعدارلاماسىنىڭ 10 جىلدىعىنا ورايلاستىرىلدى.

تالىمگەر – بۇل بالالار ۇيىندەگى جاسوسپىرىممەن تاجىريبە بولىسەتىن، وعان ەرەسەك ءومىر ءسۇرۋ داعدىلارىن يگەرۋگە كومەكتەسەتىن، قيىن ساتتەردە قولداۋ كورسەتەتىن جانە بولاشاقتى تاڭداۋدا كومەكتەسەتىن ەرەسەك ادام. تالىمگەر بولۋ ءۇشىن قازاقستان ازاماتى ارنايى وقۋدان ءوتىپ، بەلگىلى ءبىر تالاپتارعا ساي بولۋى كەرەك.

«قازاقستاندا تالىمگەرلىك ينستيتۋتىنىڭ دامۋى مەملەكەتتىڭ، ۇكىمەتتىك ەمەس ۇيىمداردىڭ جانە بەلسەندى ازاماتتاردىڭ كۇش-جىگەرىن بىرىكتىرۋ ارقاسىندا مۇمكىن بولدى. تالىمگەرلىك ينستيتۋتىن بەكىتۋ ءۇشىن اۋقىمدى جۇمىس اتقارىلدى: بالا قۇقىقتارى تۋرالى زاڭعا وزگەرىستەر ەنگىزىلدى، بىرنەشە نورماتيۆتىك-قۇقىقتىق اكتىلەر قابىلداندى. بۇل ءىس-شارا جاي عانا وقيعا ەمەس، ول تالىمگەرلىك ينستيتۋتىنىڭ جاڭا دەڭگەيگە كوتەرىلىپ، تانىلۋى مەن تۇسىنىلەتىنىنە بەلگى بولىپ تابىلادى. بۇگىن مۇندا جينالعان ادامدار تۇسىنەدى: ءدال ادامدىق قاتىسۋ، قامقورلىق جانە قولداۋ بالاعا ءومىر بويى سۇيەنەرلىك نەگىز بولا الادى»، - دەدى بالالاردى قورعاۋ جونىندەگى كوميتەتتىڭ ءتورايىمى ناسىمجان وسپانوۆا.

«دارا» قورى 2015 جىلدان بەرى جۇزەگە اسىرىپ كەلە جاتقان «تالىمگەرلەر» باعدارلاماسى بالالار ءۇيىنىڭ تاربيەلەنۋشىلەرىن تالىمگەرلەرىمەن قاۋىشتىرىپ، سول ارقىلى بالالاردى قولداۋ مەن الەۋمەتتەندىرۋدى كوزدەيدى. بۇگىندە باعدارلاما قازاقستاننىڭ 18 قالاسىندا جۇمىس ىستەپ، 360-تان استام جاسوسپىرىمگە دەربەس ومىرگە قادام باسۋعا كومەكتەستى. باعدارلامانىڭ اۋقىمى جىل سايىن كەڭەيىپ، قاتىسۋشىلار سانى ارتىپ كەلەدى.

باعدارلاما العاش رەت استانا، الماتى جانە قاراعاندى قالالارىندا ىسكە قوسىلدى. سول كەزدە قاراعاندى وبلىسى ءبىلىم باسقارماسىنىڭ باسشىسى بولعان اسحات ايماعامبەتوۆ ۇزاق جىلعى جۇمىستىڭ ناتيجەلەرى مەن تالىمگەرلىكتى زاڭنامالىق دەڭگەيدە بەكىتۋ ماڭىزدىلىعى تۋرالى ايتىپ ءوتتى.

«ون جىل ىشىندە ءبىز تالىمگەرلىك جوباسىنىڭ تۇراقتى، ءتيىمدى جانە شىن مانىندە قاجەتتى ەكەنىنە كوز جەتكىزدىك. بۇل جوبانى زاڭ دەڭگەيىندە نەگە بەكىتۋ قاجەت؟ ەڭ الدىمەن ءاربىر تاراپتىڭ، بارلىق مۇددەلى تاراپتاردىڭ جاۋاپكەرشىلىگى مەن قۇقىقتارىن بەكىتۋ ءۇشىن. «تالىمگەرلەر» باعدارلاماسىنىڭ تاجىريبەسى بارلىق نەگىزگى اسپەكتىلەردى ەسكەرۋگە مۇمكىندىك بەردى: كىم تالىمگەر بولا الادى، ونىڭ قۇقىقتارى مەن مىندەتتەرى قانداي، تالىمگەرلەر مەكتەبى قالاي جۇمىس ىستەيدى، سەرتيفيكاتتاۋ ماسەلەلەرى جانە بارلىق تاراپتاردىڭ، سونىڭ ىشىندە مەملەكەتتىك ورگانداردىڭ جاۋاپكەرشىلىگى. باعدارلامانىڭ كوپجىلدىق تاجىريبەسى زاڭنامالىق تۇردە قانداي نورمالاردى بەكىتۋ ماڭىزدى ەكەنىن كورسەتتى»، - دەدى اسحات ايماعامبەتوۆ.

فورۋمدا سونداي-اق تالىمگەرلەر مەن ولاردىڭ ءتالىم الۋشىلارىنىڭ ءسوز سويلەۋلەرى ءوتتى، وندا ولار ءوز دوستىقتارى تۋرالى اڭگىمەلەدى: بالانىڭ سەنىمىن قالاي جاۋلاپ العاندارى، ونىڭ الەۋەتىن قالاي اشقاندارى، وزىنە سەنۋگە كومەكتەسكەندەرى تۋرالى، سونداي-اق ءتالىم الۋشىلاردىڭ ەرەسەك ومىرىندەگى ناقتى جەتىستىكتەرىمەن ءبولىستى.

««تالىمگەرلەر» باعدارلاماسى – ايقىن ادىستەمە مەن كاسىبي كوماندا. ءبىز كوپ جەتىستىككە جەتتىك، ءبىراق توقتاپ قالمايمىز، ويتكەنى ءاربىر وعان مۇقتاج ءجاسوسپىرىمنىڭ ءوز تالىمگەرى بولۋى كەرەك ەكەنىنە سەنىمدىمىز»، - دەدى «دارا» قايىرىمدىلىق قورىنىڭ نەگىزىن قالاۋشى گۇلنار دوسايەۆا.

«دارا» قورى 2007 جىلدان باستاپ بالالار ۇيىندەگى جاسوسپىرىمدەردى قولداۋ مەن ءبىلىم الۋدا ارنايى قاجەتتىلىكتەرى بار بالالار ءۇشىن ءبىلىم ءالىعا جاعداي جاساۋ سالاسىندا قايىرىمدىلىق جوبالارىن ىسكە اسىرىپ كەلەدى.