Qazaqstanda 2050 jylǵa deiingi azamattyq aviatsiiany damytýǵa arnalǵan master-jospar ázirlenip jatyr, dep habarlaidy Dala news.
Kólik ministrliginiń málimetinshe, vedomstvoda vitse-ministr Talǵat Lastaev Halyqaralyq azamattyq aviatsiia uiymy (IKAO) sarapshylar tobynyń joba úilestirýshisi Lýiza Stolspen kezdesti. Kezdesý Qazaqstannyń azamattyq aviatsiia salasyn 2050 jylǵa deiin damytý jónindegi master-jospardy (CAMP) ázirleý jumystarynyń bastalýyna orai uiymdastyrylǵan.
Ministrlik aqparat boiynsha, IKAO sarapshylary ázirleitin CAMP qujaty Qazaqstannyń azamattyq aviatsiia júiesin sapaly ári teńgerimdi damytýǵa baǵyttalǵan strategiialyq baǵdar bolmaq. Qujat halyqaralyq úzdik tájiribelerdi eskere otyryp daiyndalady.
Qazirgi tańda elde azamattyq aviatsiiany damytýǵa memlekettik deńgeide basymdyq berilip otyr. Áýejai infraqurylymy keń kólemde jańǵyrtylýda, otandyq áýe kompaniialary áýe kemeleri parkin batys óndirisiniń zamanaýi ushaqtarymen turaqty túrde jańartyp, keńeitýde. Sonymen qatar, jalpy maqsattaǵy aviatsiia, ushqyshsyz aviatsiia sektory damyp keledi jáne salanyń turaqty damýyn qamtamasyz etýge baǵyttalǵan tásilder engizilýde.
Lýiza Stolstyń sapary aiasynda salanyń negizgi qatysýshylarymen kezdesýler ótkizý, qoldanystaǵy strategiialyq qujattardy taldaý jáne CAMP-tiń jumys josparyn ázirleý josparlanǵan.
Ministrliktiń atap ótýinshe, IKAO sarapshylary ázirleitin CAMP táýelsiz ári kásibi saraptamalyq baǵalaý bolmaq jáne ol Qazaqstannyń azamattyq aviatsiia salasyn uzaq merzimdi, shynaiy ári básekege qabiletti model boiynsha damytýǵa múmkindik beredi.
