2025 jyldyń qorytyndysy boiynsha Qazaqstanda avtonesie berý kólemi 29,8%-ǵa ósip, jalpy somasy 2,4 trln teńgege jetti. Osylaisha, bul segment alǵash ret ipotekalyq nesieleý naryǵymen teń deńgeige shyqty. Bul týraly Qazaqstan qarjygerler qaýymdastyǵy málimdedi, dep habarlaidy Dalanews.kz.
Avtonesieleý bólshek nesie naryǵyndaǵy úlesin aitarlyqtai arttyrdy. Jyl qorytyndysynda halyqqa berilgen jańa nesieler qurylymyndaǵy onyń úlesi 9,4%-dan 13,2%-ǵa deiin ósti. Al bólshek nesie portfelindegi úlesi 13,7%-dan 16,2%-ǵa deiin ulǵaiǵan.
Sarapshylardyń aitýynsha, avtonesie berý kóleminiń jedel ósýi men portfeldiń 42%-ǵa artýy táýekel kórsetkishteriniń salystyrmaly túrde turaqty bolýymen qatar júrdi. Jyl sońynda merzimi ótken bereshek úlesi 2,8%-dan 2,7%-ǵa deiin tómendep, bólshek nesie naryǵyndaǵy ortasha deńgeiden (4,0%) tómen saqtalǵan. Bul, bir jaǵynan, avtonesieniń kepilmen qamtamasyz etilýimen, ekinshi jaǵynan, qaryz alýshylardy irikteý talaptarynyń qatań bolýymen túsindiriledi. Sonymen qatar ótinimderdiń maquldaný deńgeiiniń tómen bolýy bankterdiń saqtyqqa negizdelgen nesielik saiasatyn ustanyp otyrǵanyn jáne júiede artyq táýekelderdiń jinalýyna jol bermeitinin kórsetedi.
Degenmen sarapshylar jyldyń ekinshi jartysynda avtonesieleý naryǵynda qanyǵý belgileri baiqalǵanyn atap ótti. Qarjylandyrý qunynyń ósýi men marketingtik baǵdarlamalardyń aiaqtalýyna bailanysty avtonesieler boiynsha mólsherlemeler 14,6%-dan 22,9%-ǵa deiin kóterilgen. Bul óz kezeginde jańa nesie berýdiń qarqynynyń báseńdeýine áser etken.
