2025 جىلدىڭ قورىتىندىسى بويىنشا قازاقستاندا اۆتونەسيە بەرۋ كولەمى 29،8%-عا ءوسىپ، جالپى سوماسى 2،4 ترلن تەڭگەگە جەتتى. وسىلايشا، بۇل سەگمەنت العاش رەت يپوتەكالىق نەسيەلەۋ نارىعىمەن تەڭ دەڭگەيگە شىقتى. بۇل تۋرالى قازاقستان قارجىگەرلەر قاۋىمداستىعى مالىمدەدى، دەپ حابارلايدى Dalanews.kz.

اۆتونەسيەلەۋ بولشەك نەسيە نارىعىنداعى ۇلەسىن ايتارلىقتاي ارتتىردى. جىل قورىتىندىسىندا حالىققا بەرىلگەن جاڭا نەسيەلەر قۇرىلىمىنداعى ونىڭ ۇلەسى 9،4%-دان 13،2%-عا دەيىن ءوستى. ال بولشەك نەسيە پورتفەلىندەگى ۇلەسى 13،7%-دان 16،2%-عا دەيىن ۇلعايعان.

ساراپشىلاردىڭ ايتۋىنشا، اۆتونەسيە بەرۋ كولەمىنىڭ جەدەل ءوسۋى مەن پورتفەلدىڭ 42%-عا ارتۋى تاۋەكەل كورسەتكىشتەرىنىڭ سالىستىرمالى تۇردە تۇراقتى بولۋىمەن قاتار ءجۇردى. جىل سوڭىندا مەرزىمى وتكەن بەرەشەك ۇلەسى 2،8%-دان 2،7%-عا دەيىن تومەندەپ، بولشەك نەسيە نارىعىنداعى ورتاشا دەڭگەيدەن (4،0%) تومەن ساقتالعان. بۇل، ءبىر جاعىنان، اۆتونەسيەنىڭ كەپىلمەن قامتاماسىز ەتىلۋىمەن، ەكىنشى جاعىنان، قارىز الۋشىلاردى ىرىكتەۋ تالاپتارىنىڭ قاتاڭ بولۋىمەن تۇسىندىرىلەدى. سونىمەن قاتار وتىنىمدەردىڭ ماقۇلدانۋ دەڭگەيىنىڭ تومەن بولۋى بانكتەردىڭ ساقتىققا نەگىزدەلگەن نەسيەلىك ساياساتىن ۇستانىپ وتىرعانىن جانە جۇيەدە ارتىق تاۋەكەلدەردىڭ جينالۋىنا جول بەرمەيتىنىن كورسەتەدى.

دەگەنمەن ساراپشىلار جىلدىڭ ەكىنشى جارتىسىندا اۆتونەسيەلەۋ نارىعىندا قانىعۋ بەلگىلەرى بايقالعانىن اتاپ ءوتتى. قارجىلاندىرۋ قۇنىنىڭ ءوسۋى مەن ماركەتينگتىك باعدارلامالاردىڭ اياقتالۋىنا بايلانىستى اۆتونەسيەلەر بويىنشا مولشەرلەمەلەر 14،6%-دان 22،9%-عا دەيىن كوتەرىلگەن. بۇل ءوز كەزەگىندە جاڭا نەسيە بەرۋدىڭ قارقىنىنىڭ باسەڭدەۋىنە اسەر ەتكەن.