Májilis depýtattary tsifrlandyrý, jol qaýipsizdigi jáne júrgizýshilerdi daiarlaý salasyndaǵy kásipkerlik qyzmet máseleleri boiynsha túzetýlerdi qarastyryp jatyr, dep habarlaidy dalanews.kz.
Zań jobasy aiasynda avtomektepterdiń jumysyna qoiylatyn talaptardy kúsheitý usynylǵan. Depýtat Ekaterina Smyshliaevanyń aitýynsha, qoǵamda joldaǵy jáne aýlalardaǵy qaýipsizdikke suranys artyp otyr.
«Zań jobasy júrgizýshilerdi daiarlaý júiesin jetildirý, salaǵa zamanaýi tsifrlyq quraldardy engizý jáne tsifrlyq ortada adamnyń qaýipsizdigin kúsheitý arqyly jol qozǵalysy qaýipsizdigin arttyrýǵa baǵyttalǵan», - dedi depýtat.
Qujatta jol erejesin buzýdy tirkeitin tehnikalyq quraldardy paidalaný tártibi naqtylanady. Sonymen qatar júrgizýshilerdi daiarlaityn oqý uiymdaryna memlekettik baqylaýdy kúsheitý usynylyp otyr.
«Avtomektepterdiń qyzmetine ruqsat berý tártibi engiziledi. Ol úshin “Ruqsattar jáne habarlamalar týraly” zańǵa ózgerister engiziledi», - dedi Ekaterina Smyshliaeva.
Depýtattyń aitýynsha, endi avtomektepter ruqsat alý úshin materialdyq-tehnikalyq bazaǵa, arnaiy oqý alańdaryna, kólik quraldaryna jáne bilikti oqytýshylar quramyna ie bolýy kerek.
«Ruqsat alý úshin avtomektepte qajetti materialdyq-tehnikalyq baza, oqý alańdary, oqý kólikteri jáne bilikti oqytýshylar bolýy tiis», - dedi depýtat.
Zań jobasynda ruqsat alǵan avtomektepterdiń arnaiy memlekettik tizilimin qurý da qarastyrylǵan. Bul júie oqý uiymdarynyń qyzmetin turaqty baqylaýǵa múmkindik beredi.
«Ruqsat alǵan oqý uiymdarynyń memlekettik tizilimi qurylýy usynylady. Tizilim ruqsat alǵannan keiin oqý uiymdarynyń qyzmetin baqylaýǵa múmkindik beredi. Tizilimdi júrgizý Ishki ister ministrligine beriledi», - dedi Smyshliaeva.
Sonymen qatar zań jobasynda meditsinalyq derekterdiń keibir túrlerin IIM-niń avtomattandyrylǵan bazasyna engizý usynylǵan.
Májiliste bul shara rólge densaýlyǵyna bailanysty qarsy kórsetilimi bar azamattardyń otyrýynyń aldyn alý úshin qajet ekeni aityldy.
