Qazaqstanda 2027 jylǵy 1 qańtardan bastap aýyl sharýashylyǵy jerlerin memleket menshigine qaitarý jáne qaita bólý rásimi tolyq elektrondy formatqa kóshiriledi, dep habarlaidy dalanews.kz.
Úkimettiń málimetinshe, jańa tetik aiasynda agrarshylar tsifrlyq jer kartasy arqyly bos jatqan jáne qaita bólinýge daiyn jer telimderin naqty ýaqyt rejiminde kórip, ótinimderin onlain joldai alady. Sonymen qatar ótinimderdiń qaralý barysyn ár kezeńde baqylaý múmkindigi beriledi.
Jańa júiede jer komissiialarynyń qatysýy alynyp tastalady. Úkimettiń málimetinshe, bul jer telimderin bólý protsesiniń ashyqtyǵyn arttyryp, adam faktoryn azaitýǵa jáne sybailas jemqorlyq táýekelderin tómendetýge múmkindik beredi.
Tsifrlyq formatqa kóshý memlekettik qyzmetterdi elektrondyq júiege kóshirý jónindegi jumystyń jalǵasy bolmaq. Buǵan deiin jer ýchaskelerine memlekettik aktilerdi berý qyzmeti de tolyqtai eGov portaly arqyly kórsetile bastaǵan.
Úkimet sondai-aq Memleket basshysynyń tapsyrmasy aiasynda paidalanylmai jatqan aýyl sharýashylyǵy jerlerin memleket menshigine qaitarý jumystary jalǵasyp jatqanyn habarlady. Búgingi kúni memleketke 13,5 mln gektar aýyl sharýashylyǵy jeri qaitarylǵan. Onyń basym bóligi qaitadan aýyl sharýashylyǵy ainalymyna engizilip, jańa jer paidalanýshylar arasynda bólingen.
Biliktiń pikirinshe, tsifrlyq tetik jer resýrstaryn tiimdi basqarýǵa, jerdi bólýdiń ashyqtyǵyn qamtamasyz etýge jáne aýyl sharýashylyǵy jerlerin igerý tiimdiligin arttyrýǵa yqpal etedi.
Eske salaiyq, sońǵy jyldary Qazaqstanda jer qatynastaryn tsifrlandyrý kezeń-kezeńimen júzege asyrylyp keledi. Bul baǵytta jer ýchaskelerin rásimdeý, memlekettik qyzmetterdi onlain kórsetý jáne biryńǵai memlekettik jyljymaityn múlik kadastrynyń aqparattyq júiesin damytý boiynsha jumystar júrgizilýde.
