Qazaqstan Qorǵanys ministrligi armiiadaǵy eńbekaqyny arttyrýdyń kelesi tolqynyna kirisetinin jariialady. Jańa tártip boiynsha ofitserlerdiń jalaqysy edáýir ósse, qatardaǵy jaýyngerler men serjanttardyń tabysy da qosymsha ulǵaiady, dep habarlaidy Dalanews.kz.
Ministrlik deregine súiensek, jyl basynan beri áskeri qyzmetshilerdiń tabysy aitarlyqtai kóbeigen. 2025 jylǵy 1 qańtardan bastap ofitserler orta eseppen 20 paiyzdan astam ústeme alǵan, al tómengi quramnyń jalaqysy úshten birine jýyq artqan. Buǵan qosa, birneshe jyl buryn toqtatylǵan dalalyq tólemder qaita iske qosylǵan.
Endi 1 shildeden bastap áskeri jattyǵýlarǵa, teńizdegi qyzmetke nemese oqý-jiyndaryna qatysqan sarbazdar men ofitserler árbir kúni úshin qosymsha aqy alady. Bul tólem issapar retinde rásimdelmeidi jáne mólsheri 1,2 ailyq eseptik kórsetkishke teń bolady. 2026 jyly bul shamamen 5 190 teńgeni quraidy.
Budan bólek, memleket áskerde júrgen azamattardyń qarjylyq jaǵdaiyn jeńildetý sharalaryn da qolǵa alǵan. Qazirgi tańda merzimdi qyzmettegi 20 myńnan astam sarbazdyń banktik qaryzdary ýaqytsha toqtatylyp, jalpy somasy 8 milliard teńgege jýyq nesiege «demalys» berilgen.
