قازاقستان قورعانىس مينيسترلىگى ارمياداعى ەڭبەكاقىنى ارتتىرۋدىڭ كەلەسى تولقىنىنا كىرىسەتىنىن جاريالادى. جاڭا ءتارتىپ بويىنشا وفيسەرلەردىڭ جالاقىسى ەداۋىر وسسە، قاتارداعى جاۋىنگەرلەر مەن سەرجانتتاردىڭ تابىسى دا قوسىمشا ۇلعايادى، دەپ حابارلايدى Dalanews.kz.
مينيسترلىك دەرەگىنە سۇيەنسەك، جىل باسىنان بەرى اسكەري قىزمەتشىلەردىڭ تابىسى ايتارلىقتاي كوبەيگەن. 2025 جىلعى 1 قاڭتاردان باستاپ وفيسەرلەر ورتا ەسەپپەن 20 پايىزدان استام ۇستەمە العان، ال تومەنگى قۇرامنىڭ جالاقىسى ۇشتەن بىرىنە جۋىق ارتقان. بۇعان قوسا، بىرنەشە جىل بۇرىن توقتاتىلعان دالالىق تولەمدەر قايتا ىسكە قوسىلعان.
ەندى 1 شىلدەدەن باستاپ اسكەري جاتتىعۋلارعا، تەڭىزدەگى قىزمەتكە نەمەسە وقۋ-جيىندارىنا قاتىسقان ساربازدار مەن وفيسەرلەر ءاربىر كۇنى ءۇشىن قوسىمشا اقى الادى. بۇل تولەم ءىسساپار رەتىندە راسىمدەلمەيدى جانە مولشەرى 1،2 ايلىق ەسەپتىك كورسەتكىشكە تەڭ بولادى. 2026 جىلى بۇل شامامەن 5 190 تەڭگەنى قۇرايدى.
بۇدان بولەك، مەملەكەت اسكەردە جۇرگەن ازاماتتاردىڭ قارجىلىق جاعدايىن جەڭىلدەتۋ شارالارىن دا قولعا العان. قازىرگى تاڭدا مەرزىمدى قىزمەتتەگى 20 مىڭنان استام ساربازدىڭ بانكتىك قارىزدارى ۋاقىتشا توقتاتىلىپ، جالپى سوماسى 8 ميلليارد تەڭگەگە جۋىق نەسيەگە «دەمالىس» بەرىلگەن.
