Qazaqstanda áskeri oqý oryndaryna qabyldaý eGov arqyly onlain formatqa aýystyryldy, dep habarlaidy Dalanews.kz.
Qorǵanys ministrligi áskeri oqý oryndaryna qujattar tapsyrýdyń tsifrlyq mehanizmin engizdi. 2026 jylǵy 1 aqpannan bastap QR Qorǵanys ministrliginiń áskeri oqý oryndaryna qabyldaý týraly ótinishter eGov.kz portalynda onlain rejimde qabyldanady.
Qujat tapsyrýǵa 18-24 jas aralyǵyndaǵy er azamattar qatysa alady. Ótinishterdi qabyldaý 2026 jylǵy 10 maýsymǵa deiin jalǵasady.
Ótinish berý úshin eGov.kz portalynda avtorizatsiiadan ótip, "Azamattarǵa" – "Áskeri esep jáne qaýipsizdik" – "Áskeri qyzmet" bólimderine kirý qajet. Sodan keiin "Áskeri oqý oryndaryna qabyldaý ótinishterin berý" qyzmetin tańdap, elektron formany toltyrý kerek. Úmitker negizgi málimetterdi kórsetip, oqý ornyn tańdap, jeke derekterdi óńdeýge kelisim beredi jáne ótinishti qol qoiýdyń qoljetimdi tásilderiniń biri arqyly rastaidy.
Ótinish berýshi týraly aqparat avtomatty túrde tekseriledi. Júie psihonevrologiialyq, narkologiialyq jáne týberkýlez dispanserlerinen, sondai-aq, sottylyǵy men múgedektik mártebesi týraly derekterdi suraidy. Jeke kýálikter, bilim týraly málimetter jáne UBT nátijeleri memlekettik aqparattyq júielerden birden alynady.
Ótinishtiń nátijesi paidalanýshynyń jeke kabinetinde "Qyzmet alý tarihy" bóliminde kórsetiledi. Qabyldanǵan jaǵdaida ókiletti tulǵanyń tsifrlyq qolymen rastalǵan elektron qujat beriledi; bas tartylǵan jaǵdaida da habarlama jiberiledi.
QR Qorǵanys ministrliginiń bilim berý júiesinde ofitserlerdi daiarlaityn Qurlyq áskerleriniń áskeri institýty (Almaty), Áýe qorǵanysy kúshteriniń áskeri institýty (Aqtóbe), Radioelektronika, jáne bailanys áskeri-injenerlik institýty (Almaty) sekildi úsh joǵary oqý orny, sondai-aq serjanttar quramyn daiarlaityn bes áskeri kolledj bar.
