قازاقستاندا اسكەري وقۋ ورىندارىنا قابىلداۋ eGov ارقىلى ونلاين فورماتقا اۋىستىرىلدى، دەپ حابارلايدى Dalanews.kz.
قورعانىس مينيسترلىگى اسكەري وقۋ ورىندارىنا قۇجاتتار تاپسىرۋدىڭ سيفرلىق مەحانيزمىن ەنگىزدى. 2026 جىلعى 1 اقپاننان باستاپ ق ر قورعانىس مينيسترلىگىنىڭ اسكەري وقۋ ورىندارىنا قابىلداۋ تۋرالى وتىنىشتەر eGov.kz پورتالىندا ونلاين رەجيمدە قابىلدانادى.
قۇجات تاپسىرۋعا 18-24 جاس ارالىعىنداعى ەر ازاماتتار قاتىسا الادى. وتىنىشتەردى قابىلداۋ 2026 جىلعى 10 ماۋسىمعا دەيىن جالعاسادى.
ءوتىنىش بەرۋ ءۇشىن eGov.kz پورتالىندا اۆتوريزاسيادان ءوتىپ، "ازاماتتارعا" – "اسكەري ەسەپ جانە قاۋىپسىزدىك" – "اسكەري قىزمەت" بولىمدەرىنە كىرۋ قاجەت. سودان كەيىن "اسكەري وقۋ ورىندارىنا قابىلداۋ وتىنىشتەرىن بەرۋ" قىزمەتىن تاڭداپ، ەلەكترون فورمانى تولتىرۋ كەرەك. ۇمىتكەر نەگىزگى مالىمەتتەردى كورسەتىپ، وقۋ ورنىن تاڭداپ، جەكە دەرەكتەردى وڭدەۋگە كەلىسىم بەرەدى جانە ءوتىنىشتى قول قويۋدىڭ قولجەتىمدى تاسىلدەرىنىڭ ءبىرى ارقىلى راستايدى.
ءوتىنىش بەرۋشى تۋرالى اقپارات اۆتوماتتى تۇردە تەكسەرىلەدى. جۇيە پسيحونيەۆرولوگيالىق، ناركولوگيالىق جانە تۋبەركۋلەز ديسپانسەرلەرىنەن، سونداي-اق، سوتتىلىعى مەن مۇگەدەكتىك مارتەبەسى تۋرالى دەرەكتەردى سۇرايدى. جەكە كۋالىكتەر، ءبىلىم تۋرالى مالىمەتتەر جانە ۇبت ناتيجەلەرى مەملەكەتتىك اقپاراتتىق جۇيەلەردەن بىردەن الىنادى.
ءوتىنىشتىڭ ناتيجەسى پايدالانۋشىنىڭ جەكە كابينەتىندە "قىزمەت الۋ تاريحى" بولىمىندە كورسەتىلەدى. قابىلدانعان جاعدايدا وكىلەتتى تۇلعانىڭ سيفرلىق قولىمەن راستالعان ەلەكترون قۇجات بەرىلەدى؛ باس تارتىلعان جاعدايدا دا حابارلاما جىبەرىلەدى.
ق ر قورعانىس مينيسترلىگىنىڭ ءبىلىم بەرۋ جۇيەسىندە وفيسەرلەردى دايارلايتىن قۇرلىق اسكەرلەرىنىڭ اسكەري ينستيتۋتى (الماتى)، اۋە قورعانىسى كۇشتەرىنىڭ اسكەري ينستيتۋتى (اقتوبە)، راديوەلەكترونيكا، جانە بايلانىس اسكەري-ينجەنەرلىك ينستيتۋتى (الماتى) سەكىلدى ءۇش جوعارى وقۋ ورنى، سونداي-اق سەرجانتتار قۇرامىن دايارلايتىن بەس اسكەري كوللەدج بار.
