Qazaqstanda áskerge bir jyl boiy júrmei-aq, zańdy túrde áskeri bilet alýǵa bola ma Qorǵanys ministriniń orynbasary Serik Borambaev Májilis kýlýarynda osy máselege núkte qoiyp, áskerge barýdyń zańdy balamasy týraly pikir bildirdi, dep habarlaidy Dalanews.kz
Ministrlik ókiliniń sózinshe, ázirge elimizde dini nemese moraldyq sebeptermen áskerden bas tartýǵa múmkindik beretin «balama qyzmet» (alternativnaia slýjba) júiesi joq. Alaida zań sheńberinde basqa tiimdi jol qarastyrylǵan.
40 kún jáne 300 myń teńge
Eger siz tolyq merzimge kazarmaǵa barǵyńyz kelmese, biraq áskeri bilet qajet bolsa, aqyly daiyndyq kýrsynan ótýge bolady. Biraq bul barlyǵyna birdei ruqsat etilmeidi.
Serik Borambaevtyń aitýynsha, bul múmkindikti paidalaný úshin azamat:
-
24 jasqa tolǵan bolýy kerek;
-
Densaýlyǵyna nemese otbasylyq jaǵdaiyna bailanysty aldyn ala keiinge qaldyrý (otsrochka) quqyǵyna ie bolýy tiis.
«Resmi túrde aqysyn tólep, 40 kúndik daiyndyq kýrsynan ótip, áskeri bilet alýǵa bolady. Qazir naqty esimde joq, baǵasy shamamen 240 myń men 300 myń teńgeniń aralyǵynda», – dedi ministr orynbasary.
Áskeri komissariatqa barý mindetti emes
Eń qyzyǵy, bul protsesti bastaý úshin uzyn-sonar kezekke turyp, áskeri komissariattyń esigin tozdyrýdyń qajeti joq. Zaman talabyna sai bári tsifrlandyrylǵan.
Ótinimdi online túrde, «tsifrlyq áskeri komissariat» arqyly berýge bolady.
Júie óte qarapaiym jumys isteidi:
-
Siz onlain ótinim beresiz («Maǵan áskeri bilet kerek, qyzmet ótegim keledi» dep).
-
Kezekke turasyz.
-
Tólemaqy jasaisyz.
-
Kezegińiz kelgende 40 kúndik qyzmetti óteisiz.
Esterińizge sala keteiik, 2025 jyldyń sońyna deiin Qazaqstanda 18 ben 27 jas aralyǵyndaǵy 22 myńǵa jýyq azamatty merzimdi áskeri qyzmetke shaqyrý josparlanǵan. Biylǵy jańashyldyq – shaqyrtý qaǵazdary endi SMS habarlama arqyly jáne eGov portaly arqyly da jiberilýde.
