Májilis ańshylyq salasy men janýarlar dúniesin qorǵaýǵa qatysty jańa zań jobasyn birinshi oqylymda maquldady, dep habarlaidy dalanews.kz.
Qujatta ań aýlaý erejelerin qatańdatý, zańsyz ańshylyqpen kúresti kúsheitý jáne sirek janýarlardy qorǵaý sharalary qarastyrylǵan,
Jańa normalarǵa sáikes, Qazaqstanda ańshylarǵa túngi kórý qurylǵylaryn, teplovizorlardy, infraqyzyl jáne elektrondyq-optikalyq quraldardy paidalanýǵa tyiym salynbaq. Sonymen qatar qurlardyń úiirge jinalý kezeńinde qoryqshysyz ań aýlaýǵa shekteý engiziledi.
Zań jobasynda zańsyz aýlanǵan janýarlar men olardyń bólikterin internette kórsetý, saqtaý, tasymaldaý jáne satý úshin ákimshilik jaýapkershilik qarastyrylǵan. Bul talap jabaiy janýarlardyń múiizi, terisi jáne basqa da derivattaryn áleýmettik jelilerde jarnamalaýǵa da qatysty bolmaq.
Sondai-aq tańbalanbaǵan nemese zańsyz tańbalanǵan aqbóken múiizderin saqtaǵany men satqany úshin de jaza engiziledi. Májiliste bul normalar brakonerlikpen kúresti kúsheitý úshin qajet ekeni aityldy.
Qujatta ańshylyq sharýashylyqtary men qoryqshylardyń quzyreti de keńeitilgen. Endi olar ákimshilik quqyqbuzýshylyq isteri aiasynda kólikterdi tekserip, ustaýǵa jáne paidalanýǵa tyiym salý sharalaryn qoldana alady.
Budan bólek, zań jobasy janýarlar dúniesin qorǵaý, olardyń sanyn retteý jáne sirek túrlerdi tirkeý tártibin naqtylaidy. Sonymen qatar tabiǵi qaýmaldarda ań ósirýdi damytý jáne zańsyz aýlanǵan janýarlardy zańdastyrýǵa jol bermeý úshin arnaiy tirkeý júiesi engizilmek.
