Qazaqstan Prezidenti Qasym-Jomart Toqaev Úkimettiń keńeitilgen otyrysyn qorytyndylai kele, alǵa qoiylǵan mindetterdi oryndaý úshin memlekettik apparat tiimdi jumys atqarýy qajet ekenin atap ótti, dep habarlaidy Dalanews.kz.
“Ákimderdi tikelei sailaýdyń nátijesinde memlekettik qyzmetshilerdiń jańa sanaty – sailanatyn basshylar paida boldy. Bul – eki jarym myńnan astam basshy laýazymyndaǵy qyzmetker degen sóz. Olardyń arasynda buryn memlekettik qyzmette jumys istemegen azamattar, sonyń ishinde jastar kóp. Sol sebepti sailanǵan ákimder men túrli deńgeidegi basshylardy keshendi daiyndyqtan ótkizý máselesi óte ózekti bolyp tur. Úkimetke Memlekettik qyzmet isteri agenttigimen birlesip, "Ákimder mektebi" oqytý jobasyn iske qosýdy tapsyramyn. Bul rette osyndai jumysty júrgizip jatqan "Amanat" partiiasynyń tájiribesin eskergen jón”, - dedi Prezident.
Memleket basshysynyń aitýynsha, memlekettik apparattyń basty mindeti – azamattardy tolǵandyratyn ózekti máselelerdi sheshý.
“Ol úshin, eń aldymen, azamattarmen udaiy bailanysta bolý kerek. Onsyz bolmaidy. Sondyqtan halyqtan kelip túsetin ótinishterge airyqsha nazar aýdarý qajet. Byltyrdyń ózinde Prezident Ákimshiligine 50 myńnan astam ótinish kelip túsken, al elimizdegi barlyq memlekettik organdarǵa shamamen 4 million ótinish joldanǵan. Bul kórsetkish jyldan jylǵa kóbeiýde.
Bir jaǵynan, bul jurttyń "Halyq únine qulaq asatyn memleket" tujyrymdamasyna senetinin kórsetedi. Alaida, sonymen birge, bul olardyń ótinishteri men máseleleri memlekettik organdardyń kúndelikti jumysy barysynda sheshimin tappai jatqanyn ańǵartady. Sondyqtan olqylyqtar men kemshilikterdi joiý úshin tiianaqty jumys júrgizý qajet. Ádette azamattardyń ótinishteriniń artynda adam taǵdyry turady, sondyqtan, bul jerde barlyq quzyrly organdar jumyla jumys isteýge tiis”, - dep atap ótti ol.
