Táýelsizdiktiń arqasynda aqshanyń astynda qalǵan milliarderler men millionerler márttik tanytyp, otyz jylǵy ádiletsizdikten ábden qajyǵan halyqqa qol ushyn sozady degen senim bildirgen.
Toqaev osy arqyly Qazaqstanda qaiyrymdylyq institýtyn qalyptastyrǵysy keletinin aitqan.
Osy otyz jylda jeti urpaǵyna jetip jyǵylatyn bailyq jiǵan oligarhtar halyqqa qaryzdar ekenin eske salǵan.
Toq eterin aitqanda áleýmettik saiasatty júzege asyrý memleket qana emes, aitalyq Qazaqstannyń eń aýqatty adamy Bolat Ótemuratovtyń da mindeti ekenin meńzegen.
...
Bul ideianyń avtory Toqaev emes. Áýelden álemdik tájiribede bar úrdis. Prezident osy oraida Forbes tizimindegi keibir qaltalylar 2017 jyly Niý-Iorktegi memlekettik mektepte oqityn oqýshylardy tegin ystyq tamaqpen qamtamasyz etkenin mysal etken.
Toqaev aitqan Amerikada tapqan-taianǵanyn halyqpen bólispeitin qaltalynyń qadiri joq.
Tipti milliondap salyq tólep memleket biýdjetin baiytyp otyrsańyz da, eger tabysyńyzdyń belgili bir bóligin qaiyrymdylyqqa jumsamasańyz halyqtyń qarǵysyna qalasyz.
Qaiyrymdylyq AQSh-tyń ómir salty. Amerikanyń bailary basqadan aiasa da, qaiyrymdylyqqa kelgende tartynyp qalmaidy. Máselen byltyr Amerikanyń qaiyrymdylyq qorlaryna 426 mlrd dollar aýdarylǵan.
Qoly ashyqtyń - joly ashyq. Mundai azamattardy memleket te únemi qoldap-qolpashtap otyrady. Olarǵa da stimýl kerek qoi! Qaiyrymdylyq jasaǵan kásipkerdiń aqshasy salyq esebinde júredi.
Bylaisha aitqanda tapqan tabysynyń birshamasyn qaiyrymdylyqqa aýdarǵan kásipker osy arqyly memleketke tóleitin salyǵyn tómendete alady.
Amerikadaǵy qaiyrymdylyqqa qatysty taǵy bir qyzyqty jait.
Bul elde bizdegidei handardyń, batyrlardyń, aqyndardyń atyna kóshe berý dástúri joq. Esesine qaiyrymdylyq jasaǵan márt kóńil bailarǵa, kásipkerlerge, jalpy osy jumysqa ǵumyryn arnaǵan azamattarǵa kóshe ataýy beriledi. Bul da memleket ustanymy. Áleýmettik saiasatty memleketpen birlesip júrgizgen azamattarǵa kórsetken qurmeti.
Vashingtonda Djons Hopkins kóshesi bar. O kim? Hopkins óz aqshasyna ýniversitet pen med. ortalyq salyp, el igiligine bergen kásipker. Klara Barton kóshesi. Amerikadaǵy Qyzyl krest qoǵamynyń negizin qalaǵan medbike. Djon Maklin. Óz qarajatyna temirjol salyp, memqyzmetkerlerdiń jumys pen úi arasyna qatynaýyn jeńildetken baspager. Mundai mysal jetip artylady.
AQSh-taǵy álemge áigili 8 ýniversitet osylardyń qabyrǵasyn qalaýǵa járdemdesken filantroptar atymen atalady. Kóshe ǵana emes, kitaphana, vokzal, mýzei, teatr, ǵylymi ortalyqtar, aýrýhana, mektep, stadion siz senbessiz, tipti tutas qalalarǵa deiin metsenattar atymen atalady.
AQSh-ta qaiyrymdylyq jasaityn qaltaly azamat halyq aldynda syily. Halyq oǵan qala atyn berse de qarsy emes.
...
Ende elge oralaiyq. Bizge oralaiyq. Otyz jyl boiy tonalǵan Qazaqstanǵa qazirgi ýaqytta Toqaev aitqan milliarderler men millionerler kómegi kerek-aq.
Qazaqstandyq Forbes tizimindegi 50 bai el prezidentiniń úndeýine qulaq asar ma eken? Osy tizimdegi eń jas millioner pen Qazaqstandaǵy eń aýqatty adam Bolat Ótemuratovtyń (5 mlrd dollar) aralyǵyndaǵy 50 bai Qańtardan keiin qurylǵan "Qazaqstan halqyna" qoryna taily-tuiaǵy qalmai aqsha aýdarsa, ishinara halyq aldyndaǵy qaryzyn da, paryzyn da ótegen bolar edi.
Jai ǵana bai emes, jomart bai atanatyn múmkindik bul.
Belgilisi, bul qordy halyq toltyrýǵa mindetti emes.
Qazaqstanda qaiyrymdylyq institýtyn qalyptastyrǵysy keletin Toqaevtyń bastamasy Forbes tiziminen túspeitin aýqattylar atsalysqanda ǵana júzege asady.
"Bai bolsań, halqyńa paidań tisin". Baiaǵynyń bailary barlyǵy bolmasa da, kóbisi osy ustanymdy ustandy.
Másele qazirgi Qazaqstannyń bailary qandai ustanymda?..
Dýman BYQAI
