Qor qyzmet etken bir jyl ishinde oblystyń eki turǵynyna 11 mln teńgeniń qymbat protezderi berildi. Aimaǵymyzdaǵy eki balaǵa 18 mln teńgeniń ekzoqańqalary satyp alyndy. Ómirge qaýip tóndiretin jáne orfandyq aýrýlardan zardap shegetin bes naýqas 255,9 mln teńgeniń qymbat dárilik preparattaryn aldy, tamyrly patologiiasy bar jeti balaǵa em kórsetildi.
– Biz memlekettik biýdjet esebinen iske asyrý qiyn is-sharalardy ǵana atqarýymyz kerek. Bul rette, bizdiń mindetimiz – máselelerdi júieli sheshýge yqpal etetin turaqty jobalardy qolǵa alý, – dedi «Qazaqstan halqyna» qoǵamdyq qorynyń basqarýshy direktory Sofiia Aisaǵalieva.
Aimaqta qordyń qoldaýymen osy jyly erte aralasý ortalyǵy men aýtizm spektri buzylǵan balalarǵa arnalǵan ortalyq óz jumysyn bastady. Qazir qor ár aýdanda ońaltý mekemelerin ashýdy josparlap otyr.
Osyǵan bailanysty qordyń meditsinadaǵy qaiyrymdylyq qyzmetiniń negizgi baǵyty – shetelde nemese eldiń basqa óńirlerinde aýyr naýqastarǵa jekelei kómek kórsetý jáne emdeý emes, emdeýge jaǵdai týǵyzý, jergilikti jerdegi klinikalardy jaraqtandyrý. Máselen, uiym Shyǵys Qazaqstan oblystyq Ana men bala ortalyǵyn neirohirýrgiialyq jabdyqtarmen qamtamasyz etýge 34,2 mln teńge kóleminde qarajat bólýdi josparlap otyr. Sondai-aq, onkologiia men gematologiiany jańǵyrtý boiynsha iri jobalar kózdelgen.
– Jalpy, memleket tarapynan Shyǵys óńirindegi meditsinany damytýǵa qarajat bólinýde. Sondyqtan qazir Shyǵys Qazaqstan oblysy úshin áleýmettik qoldaý men bilim berý barynsha ózekti, sodan keiin sport pen mádeniet salalary boiynsha usynylatyn jobalardy qarastyrýymyz kerek, – dep túsindirdi Sofiia Aisaǵalieva.
Bilim týraly aita kele, «Qazaqstan halqyna» qorynyń basqarýshy direktory «Tirek mektepter» jobasy elimizdiń Shyǵysynda bastalǵanyn atap ótti. Sonyń arqasynda 17 aýyldyq mekteptiń materialdyq-tehnikalyq bazasy jaqsartyldy, mektepke deiingi daiarlyq jáne robotty tehnika kabinetteri, mýltimediialyq kabinet, STEM-zerthana, zamanaýi jańa zerthanasy bar fizika jáne himiia kabinetteri siiaqty barlyq baǵyttar men pánder boiynsha jańa úlgidegi kabinetter ashyldy. Endi elimizdiń 17 óńirinde osyndai 63 mektep qurý josparlanǵan.
Erekshe qajettilikteri bar balalarǵa arnalǵan arnaiy mektepterdi jabdyqtaýǵa da kóp kóńil bólinip keledi.
– Ótken jyly olardyń materialdyq bazasy shamamen 193 mln teńgege tolyqty. Bizdiń tirek mektepterimiz 1 mlrd teńgege jaraqtandyryldy. Bul – balalarymyzdyń bolashaǵyn qoldaý. Osy oń tájiribe jalǵasýǵa tiis, – dep atap ótti oblystyq bilim basqarmasynyń basshysy Innesa Chernysheva.
Qor jobalarynyń ishinde óskeleń urpaqtyń tildik quzyrettiligin, injenerlik qabiletterin damytý, sondai-aq az qamtylǵan otbasylardan shyqqan balalardyń jazǵy demalysyn uiymdastyrý jáne joǵary bilim alýǵa granttar bólý boiynsha baǵyttar da bar. Búgingi tańda Shyǵys Qazaqstannyń áleýmettik osal otbasylarynan shyqqan 33 mektep túlegi «Qazaqstan halqyna» qorynyń qoldaýy arqasynda joǵary oqý oryndarynda bilim alýǵa múmkindik alyp otyr.
